Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 525 Hüküm no: 804 Orijinal metin no: [65b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Andon’un Hüseyin b. İbrahim’deki alacağını tecil ettiği Ma‘rûz; Medîne-i Üsküdar’da Kolluk kurbünde Bakkāl dükkânında [mütemekkin] Andon v. Vasil nâm zimmî medîne-i mezbûrede mahfil-i bâbda meclis-i şer‘-i hatîrde Bostanî Hüseyin b. İbrahim mahzarında mezbûr Bostanî Hüseyin târih-i i‘lâmdan üç ay mukaddem yedimden iştirâ ve kabz eylediği vezn [ve] fiyâtı beynimizde ma‘lûm ecnâs-ı zehâir semeninden bâkī elli iki guruş on iki para zimmetinde hakkım olmağla taleb ederim deyü da‘vâ ve mezbûr Bostanî Hüseyin cevâbında fi’l-hakīka cihet-i mezkûreden ol-mikdâr deyni olduğunu ikrâr ü i‘tirâf edip lâkin meblağ-ı merkūmu edâya iktidârı olmayıp tecîle tâlib olmağla müdde‘î-i merkūm dahi meblağ-ı bâkī-i merkūm elli iki guruş on iki parayı târih-i i‘lâmdan yirmi yedi gün tamamında kendiye edâ etmek üzere mezbûr Bostanî Hüseyin’i tecîl eylediğinde ol dahi ber-vech-i muharrer müeccelen edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 18 min-Z sene 1205