Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 527 Hüküm no: 808 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basmacı İbrahim’in alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Ayazma’da Basmahâne’de sâkin Basmacı es-Seyyid İbrahim b. Ahmed meclis-i şer‘-i hatîrde Avadik v. Kigork nâm zimmî muvâcehesinde merkūm Avadik zimmî târih-i i‘lâmdan bir sene mukaddem yedimden iştirâ ve kabz eylediği sekiz değirmi yemeni semeninden on guruş ve yirmi değirmi tülbent ve bir destârını mücessem yemeni basma ücreti içün on iki guruş ki cem‘an yirmi iki guruş hakkımın dört guruşunu yedinden ahz, on sekiz guruş zimmetinde bâkī kalmağla taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle merkūm Avadik zimmî gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda merkūm Avadik zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 min-Za sene 1205