Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 563 Hüküm no: 871 Orijinal metin no: [71a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Limni Adası’na sürülen Nişli Hanım’ın evindeki eşyalarının tespiti Ma‘rûz; Sâdır olan fermân-ı âlîlerine imtisâlen kıbel-i şer‘-i şerîfden irsâl olunan Abdullah Efendi dâ‘îleri ve sâir mazbûtü’l-esâmî Müslimîn ile medîne-i Üsküdar’da Ayazma mahallesinde vâki‘ sâhib-i arzuhâl İbrahim b. Halil’in menziline varıp menzil-i mezkûrda müsteciresi iken bundan akdem Limni Cezîresi’ne nefy olunan derûn-ı arzuhâlde mezkûre Nişli Hanım demekle ma‘rûfe hatunun mukaffel menzilini küşâd ve menzil-i mezkûr derûnunda bir şayak yasdık ve iki kâse ve bir iskemle ve bir firâş ve üç hasır süpürgesi ve iki yeşil kavanoz ve iki sagīr minder ve bir Mısır? hasırı ve bir baş yasdığı ve bir öreke başı ma‘a hartı ve bir arşun ve bir mikdâr penbe ipliği ve bir sini ve bir kahve kutusu ve iki vakıyye pirinç ve iki kül tenceresi ve bir yaslıağaç ve bir tennûr ve bir kutu ve bir buçuk çeki hatab ve bir su küpü mevcûd olup eşyâ-i muharrere-i mezkûreyi bi-a‘yânihâ bâ-defter-i mümzâ mahalle-i mezbûre subaşısı ve emîn-i beytü’l-mâl olan Ahmed Ağa b. Mustafa nâm kimesneye teslîm ve menzil-i mezkûru tahliye ve sâhib-i arzuhâl İbrahim’e teslîm olunduğu mezbûr dâ‘îleri mahâllinde ba‘de’t-tahrîr ve’l-inhâ mübâşiri çavuş kulları iltimâsıyla huzûr-ı âlîlerine i‘lâm olundu. Fî 7 min-S sene 1206