Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 565 Hüküm no: 875 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Veliyüddin b. Mustafa’nın terekesinin tekrar yazılıp vârislerine taksimi talebinin hukuksuz olduğu Ma‘rûz; Medîne-i Üsküdar’a muzâfe Adalar nâhiyesine tâbi‘ Soğanlık karyesinde sâkin iken târih-i i‘lâmdan yirmi altı sene mukaddem fevt olan Veliyüddin b. Mustafa’nın verâseti zevce-i metrûkesi Âişe bt. Mustafa nâm hatun ile anası Ümmühani bt. Abdullah’ın kebîr oğulları el-Hâc Mehmed ve İbrahim ve sulbiye kebîre kızı Hadice’ye münhasıra ve tashîh meselesi yüz yirmi sehm i‘tibârıyla on beşer sehmi zevcesi mezbûreye ve yirmi sehmi anası mezbûreye ve otuz dörder sehmden altmış sekiz sehmi oğulları mezbûrâna ve on yedi sehmi kızı mezbûreye isâbeti tahakkukundan sonra sâhibe-i arzuhâl zâtı mu‘arrefe mezbûre Hadice Çarşamba günü Dîvân-ı âlî’de ba‘dehû Üsküdar mahkemesinde meclis-i şer‘-i hatîrde arzuhâlde ismi mezkûr karındaşı mezbûr el-Hâc Mehmed mahzarında mezbûr el-Hâc Mehmed babam müteveffâ-yı mezbûrun hîn-i fevtinde ben sagīre olmamla bana vasî nasb olunup tashîh-i mezkûr üzere bana isâbet eden ba-defter-i kassâm dört yüz guruş ve âhara îcâr olunan vakıf akārâtımızdan yirmi dört senede benim sülüs hisseme isâbet eden bin iki yüz yirmi guruş ki cem‘an bin altı yüz yirmi guruş hakkımı bundan akdem taleb ve da‘vâ eylediğimde beynimize muslihûn tavassut edip beni da‘vâ-yı mezkûremden beş yüz guruş bedel-i makbûz mukābelesinde karındaşım mezbûr el-Hâc Mehmed ile sulh eylediklerinde ben dahi sulh-ı mezkûru kabûl ve babam müteveffâ-yı mezbûrun dâhil-i defter ve hâric ez-defter kalîl ü kesîr cemî‘ terekesine ve husûs-ı mîrâsa müte‘allika âmme-i de‘âvîden zimmetini ibrâ ve ıskāt edip ol dahi ibrâmı kabûl eyleyip yedine ibrâ-i mezkûrumuzu hâvî bir kıt‘a ibrâ hücceti i‘tâ olunmuş idi lâkin sulh-ı mezkûr ba‘zı kimesnelerin ibrâm ve ilhâhıyla olduğuna binâen ben sulh-ı mezkûruma nâdime olmamla babam müteveffâ-yı mezbûrun bi’l-cümle terekesi tekrar tahrîr ve beynimizde taksîm olunsun deyü müdde‘iye-i mezbûre Hadice’nin takrîr-i meşrûhası üzere ba‘de’s-sulh ve’l-ibrâ karındaşı mezbûr el-Hâc Mehmed’den eylediği da‘vâsı meşrû‘a olmayıp bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 21 min-M sene 1206