Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 566 Hüküm no: 876 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Preşkova zimmînin Yanaki’den alacak talebinin geçersiz olduğu Ma‘rûz; Gelibolu kurbünde Şehirköyü kazâsına tâbi‘ Fanoz (Fanos) İskelesi reislerinden Preşkova v. Nikola nâm zimmî medîne-i Üsküdar Bâb mahkemesinde meclis-i şer‘-i hatîrde Kapıdağı reislerinden Yanaki v. Çalaldı? nâm zimmî muvâcehesinde kazâ-i mezbûrdan beher sene taraf-ı mîrîye irsâl olunacak hatabdan benim sefînem ile irsâl olunan üç yüz çeki hatabı İslâmbol ağasına teslîm eylediğimde ağa-yı mezbûr sizin kazanızın mîrî hatabından kırk iki çeki hatab noksândır deyü merkūm Yanaki zimmîyi tazyîk ve habsedip zulmen merkūm Yanaki zimmî yedinden kırk iki çeki noksân hatabın kıymeti olmak üzere altmış beş guruşa bir kıt‘a Rûmî temessük alıp bana senin taraf-ı mîrîye teslîm eylediğin noksân hatab içün merkūm Yanaki yedinden aldığım bir kıt‘a temessük mûcebince sen bana meblağ-ı merkūm altmış beş guruşu def‘ ü teslîm eyledikden sonra merkūm Yanaki zimmîye her ne zaman zafer bulursan merkūmdan ahz ü kabz eyleye [eyle] deyü İslâmbol ağasının zulmen benden tahsîl ve ahz ü kabz eylediği meblağ-ı merkūm altmış beş guruşu bi’l-mürâca‘a merkūm Yanaki zimmîden taleb ederim deyü tasaddî eylediği da‘vâsında merkūm Yanaki zimmîye suâl dahi teveccüh etmemekle müdde‘î-i merkūm Preşkova zimmî husûs-ı merkūmda bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 18 M sene 1206