Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 569 Hüküm no: 883 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mustafa’nın vakıf gelirlerinden aldığı borcu ödemesi Ma‘rûz; Medîne-i Üsküdar’da Hamzafakih mahallesinde vâki‘ merhûm Kâtib Hüseyin Efendi nâm sâhibü’l-hayrın mu‘allimhânesi vakfının hâlâ mütevellîsi Mehmed Emin b. İsmail tarafından ber-vech-i âtî vekîl olduğu Ahmed Ağa b. Mahmud ve es-Seyyid Mustafa b. Mehmed nâm kimesneler şehâdetleriyle sâbit olan Molla Mustafa b. Hasan nâm kimesne medîne-i mezbûrede meclis-i şer‘-i hatîrde Bostanî Mustafa b. Süleyman nâm kimesne mahzarında mezbûr Bostanî Mustafa bin iki yüz senesi Şa‘bâni’l-mu‘azzamı’nın yedinci günü mâl-ı vakf-ı mezbûrdan istidâne ve kabz ve umûruna sarfla istihlâk eylediği yüz elli guruş deyni mukābelesinde yine medîne-i mezbûrede Aşcıbaşı mahallesinde vâki‘ merhûme Âişe Hatun Vakfı musakkafâtından mutasarrıf olduğu ma‘lûmü’l-hudûd bir bâb vakıf menzilini bâ-ma‘rifet-i mütevellî vefâen ferâgat ve menzil-i mezkûreyi ba‘de’t-tahliye târih-i merkūmdan beher şehr yetmiş beş para ücret ile istîcâr ve kabz etmiş idi hâlâ asl-ı mâl-ı merkūm yüz elli guruş ile işbu târih-i i‘lâma gelince menzil-i mezkûr icâresinden altmış beş ayda zimmetinde müctemi‘a olan icâreden bâkī yüz on sekiz guruş beş para ki cem‘an iki yüz altmış sekiz guruş beş parayı vakıf içün bi’l-vekâle taleb ederim deyü da‘vâ ve mezbûr Bostanî Mustafa cevâbında fi’l-hakīka mâl-ı vakf-ı mezkûrdan yüz elli guruş ahzını ve menzil-i mezkûru vefâen ferâğını ikrâr lâkin menzil-i mezkûru ba‘de’t-tahliye istîcârını inkâr etmeğin vekîl-i mezbûr ber-vech-i muharrer menzil-i mezkûru tahliye ve îcâr ve istîcârını beyâna ba‘de’l-havâle mezbûr Bostanî Mustafa’nın mukırr u mu‘terif olduğu asl-ı mâl-ı vakf-ı mezkûr yüz elli guruş vakf-ı mezbûr içün mütevellî-i mezbûra edâ ve teslîme mezbûr Bostanî Mustafa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 5 min-M sene 1206