Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 570 Hüküm no: 885 Orijinal metin no: [72a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb b. Ömer’in Fatma Hanım’a olan borcundan geriye kalan miktarını da ödemesi Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Fatıma bt. Halil nâm hatun meclis-i şer‘-i hatîrde Eyüb b. Ömer mahzarında işbu yedimde olan bir kıt‘a hüccet-i şer‘iye nâtıka olduğu üzere bin iki yüz bir senesi Saferi’l-hayr’ının yirmi üçüncü günü yedimden istidâne ve kabz eylediği yüz guruş ve târih-i hüccetden beher sene tamamında bâ-devr-i şer‘î ilzâm ve iltizâm olunan on beşer guruşdan üç sene tamamına dek kırk beş guruş ki cem‘an yüz kırk beş guruş deyni mukābelesinde emlâkinden olup medîne-i mezbûreye tâbi‘ Başı[büyüklü] karyesi bâgātı hilâlinde vâki‘ Mansurovası nâm mahâlde kâin lede’l-ahâli ve’l-cîrân ma‘lûmü’l-hudûd bir kıt‘a bağını vefâen bey‘ u teslîm eyledikden sonra meblağ-ı merkūm yüz kırk beş guruşun yirmi iki guruşunu yedinden ahz ü kabz ve yüz yirmi üç guruşu mezbûr Eyüb zimmetinde bâkī kalıp fekk-i rehn ile meblağ-ı bâkī-i merkūm yüz yirmi üç guruşu hâlâ taleb ederim deyü da‘vâ, ol dahi cevâbında cihet-i mezkûreden ol-mikdâr deyni olduğunu ikrâr lâkin müdde‘iye-i mezbûreye kabzını mu‘terif olduğu yirmi iki guruşdan ziyâde sekiz guruş dahi def‘ ü teslîm etmemle müdde‘iye-i mezbûrenin yüz on beş guruş zimmetimde alacağı bâkī kalmış idi deyü ba‘de’d-def‘ ve’l-inkâr mezbûr Eyüb ziyâde def‘ini beyâna ba‘de’l-havâle fekk-i rehn edip mertebe-i ikrârı olan meblağ-ı merkūm yüz on beş guruşu müdde‘iye-i mezbûre Fatıma Hatun’a edâsıyla mezbûr Eyüb şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 19 min-M sene 1206