Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 571 Hüküm no: 886 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersane-i amire’de bağlı bulunan gemilerin safralarını boşaltmak için görevlendirilecek amelelerin nizama uygun olarak tayini Ma‘rûz; İşbu sene-i mübârekede Tersâne-i âmire’de merbût olan sefâin-i sultaniye derûnundan safra ihrâcı içün Âsitâne-i aliyye ve Eyüb ve Galata ve Üsküdar’dan külle yevm dört yüz nefer bağçevân amelesi ihzârı bâbında izzetlü Bostancıbaşı ağa kullarına hitâben beyaz üzerine sâdır olan fermân-ı âlî mûcebince ağa-yı müşârün-ileyh tarafından haseki mübâşeretiyle medîne-i Üsküdar’dan bağçevân amelesi taleb ve ihzâr murâd eyledikde onlar dahi ez-kadîm Tersâne-i âmire hizmetini Âsitâne-i aliyye tarafında olan bahçıvân tâifesi rü’yet edip bizler dahi medîne-i mezbûrede vüzerâ-yı i‘zâm ve ricâl-i Devlet-i aliyye’den Anadolu cânibine memûr olanların menzil bârgiri imdâdiyesi ve kesret-i bârân vukû‘ında münşak olan tarîk-i cadde ta‘mirâtını rü’yet edip Üsküdar bahçevânları Tersâne-i âmire hizmetinde istihdâmlarımız mesbûk değildir deyü Dîvân-ı âlî’ye takdîm eyledikleri işbu arzuhâlleri bâlâsında tâife-i mezbûrenin keyfiyet-i istihdâmları ne vechile idiği ve kethudâlarının mefsedetleri zâhire ihrâc olunmak bâbında bu dâ‘îlerine ve ağa-yı müşârün-ileyh kullarına hitâben sâdır olan fermân-ı âlîlerine imtisâlen husûs-ı mezkûra vukūf-ı tammı olan usta ve subaşı kulları ile ahâli-i Üsküdar’ın müsinn ü ihtiyârından ve esnâf-ı sâireden dahi mazbûtü’l-esâmî bî-garaz Müslimîni meclis-i şer‘a ihzâr ve ağa-yı müşârün-ileyh tarafından mübâşir ta‘yîn olunan Mustafa Haseki hâzır olduğu hâlde ber-vech-i muharrer keyfiyet-i istihdâmları istihbâr olundukda ez-kadîm Üsküdar cânibinde olan bağçevân tâifesi Devlet-i aliyye’den Anadolu cânibine memûr olan vüzerâ-yı i‘zâm ve müte‘ayyinân-ı ricâl-i Devlet-i aliyyenin menzil bârgiri imdâdiyesi ve kesret-i bârân vukū‘ında münşak olan tarîklerin ta‘mîr ve termîmi hizmetini edip ve İran cânibine olan esfâr-ı sâbıkāda tahmîl olunan hizmetlerinden mâ‘adâ Tersâne-i âmire tarafından istihdâm olundukları mesbûk olmayıp ve hizmet-i mezkûre mukābelesinde dahi bedel olmak üzere nesne ahz olunduğu ma‘lûmlarımız değildir deyü her biri meclis-i şer‘de ba‘de’l-ihbâr gerek amele ve gerek bedel tahsîli mesbûk olmadığını ocak tarafından dahi sene-i sâbıkāda tâife-i mezbûreden amele ve bedel tahsîl olunmadığını ağa-yı müşârün-ileyh tarafından dahi tecessüs ve tahkīk olunup gerek İstanbul kethudâsı ve gerek Üsküdar’da beynlerinde olan kethudâlarının bedel ahzı ve âhar bahâne ile bu bâbda kethudâlarının mefsedeti zuhûr etmemekle fî-mâ ba‘d mugāyir-i kadîm amele talebiyle medîne-i mezbûrede olan tâife-i mezbûre rencîde olunmamak bâbında fermân-ı âlîleri sudûrunu her biri istirhâm eyledikleri bi’l-iltimâs huzûr-ı âlîlerine i‘lâm olundu. Fî 17 min-S sene 1206