Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 575 Hüküm no: 893 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Ahmed’in Sabuncu Lazari tarafından dişinin çıkartıldığı yolundaki iddiasını ispatlayamadığı Ma‘rûz; Mahrûse-i Galata’ya tâbi‘ Kasımpaşa kasabasında vâki‘ Kalyoncular kışlasında sâkin Ömer b. Ahmed medîne-i Üsküdar’da mahfil-i bâbda meclis-i şer‘-i hatîrde Sabuncu Lazari v. Azerya zimmî muvâcehesinde merkūm Lazari zimmî târih-i i‘lâm günü vakt-i asrda Küçükhamam karşısında hatâen dirseği ile ağzıma darb ve ağzımın hânek-i a‘lâsının sağ tarafında seniyye ta‘bîr olunur dişime isâbet ve ihrâc etmekle mûcib-i şer‘îsini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyâna kādir olamayıp talebiyle merkūm Lazari zimmî gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda merkūm Lazari zimmîye bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 15 min-Safer sene 1206