Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 574 Hüküm no: 892 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Avadik’in Bahçıvan Simo’ya sattığı beygirin solugan hastası olmadığının tesbit olunduğu Ma‘rûz; Medîne-i Üsküdar’da Davudpaşa mahallesinde vâki‘ bağçede mütemekkin Bağçevân Simo v. İstefan nâm zimmî medîne-i mezbûrede meclis-i şer‘-i hatîrde İsak v. Avadik nâm zimmî muvâcehesinde merkūm İsak zimmî târih-i i‘lâmdan beş gün mukaddem cemî‘ uyûbdan sâlime olmak üzere emlâkinden bir re’s doru bârgirini altmış altı guruş semen-i makbûza bana bey‘ ben dahi iştirâ ve kabûl etmiş idim lâkin bârgir-i mezkûr inde’t-tüccâr noksân-ı semen îcâb eder soluğan ta‘bîr olunur illet-i kadîme ile mu‘ayyeb olmağla bârgir-i mezkûru yedimden ahz ve medfû‘um olan meblağ-ı merkūm altmış altı guruşu bana teslîme merkūm İsak zimmîye tenbîh olunmak matlûbumdur deyü da‘vâ ol dahi cevâbında zikr olunan bârgiri müdde‘î-i merkūma ol-mikdâr semen tesmiyesiyle bey‘ini ikrâr ve ayb-ı mezkûrenin vücûdunu inkâr etmeğin teveccüh-i husûmet içün bârgir-i mezkûr bu makūle uyûbda ehl-i hibre ta‘yîn olunan Abdi Ağa b. Hasan ve İsmail b. Mehmed nâm kimesnelere irâe olundukda bârgir-i mezkûrda müdde‘î-i merkūmun iddi‘â eylediği illet-i merkūme mevcûde olduğu ma‘lûmumuz olmayıp belki ayb-ı merkūmdan sahîh ve sâlimdir deyü alâ-tarîki’ş-şehâde haber vermeleriyle müdde‘î-i merkūm Simo zimmî eylediği da‘vâsında henüz hasm-ı şer‘î olmayıp merkūm İsak zimmîye husûmet dahi teveccüh etmediği bi’l-iltimâs huzûr-ı âlîlerine i‘lâm olundu. Fî 18 min-Safer sene 1206