Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 576 Hüküm no: 895 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin’in kıymetli eşyalarının Seyyid Hüseyin tarafından çalındığı yolundaki iddiasını ispatlayamadığı Ma‘rûz; Medîne-i Üsküdar’da Sinanpaşa mahallesinde sâkin Mehmed Emin b. el-Hâc Halil nâm kimesne medîne-i mezbûrede meclis-i şer‘-i hatîrde es-Seyyid Hüseyin b. Ali mahzarında mezbûr es-Seyyid Hüseyin târih-i i‘lâmdan beş gece mukaddem menzilimde misâfereten sâkin olduğu selamlık ta‘bîr olunur hâriciye odamda yasdık üzerinde mevcûde mecmû‘-ı kıymetleri üç yüz yirmi dokuz guruşa bâliğ on altı aded inci cebelü altun harclı bir kalıpnak tesbîh ve iki aded zümrüd avizeli altun köstekli bir altun sâ‘atimi ahz etmekle aynları mevcûd ise bi-a‘yânihâ müstehleke ise ba‘de’s-sübût kıymet-i şer‘iyelerini taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm ber-vech-i muharrer müdde‘âsını beyândan izhâr-ı acz birle bi’t-taleb mezbûr es-Seyyid Hüseyin gıbbe’t-tahlîfi’ş-şer‘î mûcebiyle müdde‘î-i mezbûr husûs-ı mezkûrda mezbûr es-Seyyid Hüseyin’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 18 min-S sene 1206