Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 576 Hüküm no: 896 Orijinal metin no: [73a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Reis’in borcunu ödemesi Ma‘rûz; Mahmiye-i İslâmbol’da Davudpaşa İskelesi kurbünde sâkin Ömer Reis b. Hüseyin nâm kimesne tarafından ber-vech-i âtî vekîl-i şer‘îsi olan hâlâ müvekkil-i mezbûrun zevcesi mu‘arrefetü’z-zât Rabia bt. Ahmed nâm hatun medîne-i Üsküdar’da mahfil-i bâbda meclis-i şer‘-i hatîrde es-Seyyid Mehmed Reis b. Ahmed nâm kimesne mahzarında mezbûr es-Seyyid Mehmed Reis bundan akdem zevcim müvekkil-i mezbûrun yedinden iştirâ ve kabz eylediği Dil kayığı ta‘bîr olunur bir kıt‘a kebîr mavnanın beynlerinde ma‘lûm hissesi semeninden üç yüz yirmi dört guruş mezbûr es-Seyyid Mehmed Reis zimmetinde hakkı olup hatta cihet-i mezkûreden ol-mikdâr deyni olduğunu müş‘ir bin iki yüz dört senesi Receb-i şerîf’i gurresi târihiyle işbu yedimde olan bir kıt‘a deyn temessüğü nâtık olduğu üzere mezbûr es-Seyyid Mehmed’den bi’l-vekâle hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm üç yüz yirmi dört guruşun müdde‘î-i müvekkil-i mezbûr içün vekîl-i mezbûre Rabia Hatun’a edâsıyla mezbûr es-Seyyid Mehmed Reis ilzâm olunduğu bi’l-iltimâs huzûr-ı âlîlerine i‘lâm olundu. Fî 15 min-S sene 1206