Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 581 Hüküm no: 908 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Mitro ile Angeli’nin aralarındaki alacak verecek davasında sulh oldukları Ma‘rûz; Medîne-i Üsküdar’da Yenimahalle’de mütemekkin Andon v. Mitro nâm zimmî medîne-i mezbûrede mahfil-i bâbda meclis-i şer‘-i hatîrde Angeli v. Dimitri nâm zimmî muvâcehesinde merkūm Angeli târih-i i‘lâmdan iki sene mukaddem yedimden iştirâ ve kabz eylediği vezn ve mikdârı beynimizde ma‘lûm hamr ve arak ve me’kûlât semenlerinden bâkī otuz guruş ve zimmetinde hakkım olmağla taleb ve da‘vâ sadedinde olduğumda beynimizde ba‘de-vukû‘ı’l-münâza‘a bâ-tavassut-ı muslihîn beni da‘vâ-yı mezkûremden merkūm Angeli zimmî ile yirmi beş guruş bedel-i makbûza sulh eylediklerinde ben dahi sulh-ı mezkûru kabûl ve ziyâde müdde‘âma ve bi’l-cümle husûs-ı mezkûre ve sâire, ol dahi bedel-i sulh nâmıyla medfû‘u olan yirmi beş guruşa ve sâire müte‘allika âmme-i de‘âvîden her birimiz âharın zimmetini ibrâ ve ıskāt ve her birimiz âharın ibrâsını kabûl eyledik deyü müdde‘î-i mezbûrun takrîrini merkūm Angeli tasdîk ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 19 min-S sene 1206