Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 582 Hüküm no: 910 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rapail v. Karabet ve kardeşi Mikail’in üvey anaları Gül Nasraniye ile aralarındaki miras davasının halledilmesi Ma‘rûz; Medîne-i Üsküdar’da Selami mahallesi mütemekkinlerinden arzuhâl eden Rapail v. Karabet ve [Rapail ve Karabet veledey] Mikâil nâm karındaşlar medîne-i mezbûrede meclis-i şer‘-i hatîrde arzuhâlde mezkûr üvey anaları mu‘arrefetü’ş-şahs Gül bt. Avadik nâm Nasrâniye muvâcehesinde li-ebeveyn er karındaşlarımız olup dört sene mukaddem hâlik olan Hamparsum ile altı sene mukaddem hâlik olan Manuk zimmîlerin terekelerinden cem‘an kıymetleri iki yüz otuz guruşa bâliğ bir sîmli bıçak ve bir neftî çuka biniş ve bir mavi çuka biniş ve bir çuka şalvar ve bir göğez şal ve bir nîmten ve bir yelek ve dört çevre ve iki hilâlî gömlek ve altı vakıyye evânî-i nühâsiye ile hâlik-i merkūm Manuk zimmînin nakden zuhûr eden bin altı yüz guruş ve hâlik-i merkūm Hamparsum zimmînin Uzunçayır nâm mahâlde vâki‘ bir kıt‘a bağ kıymeti olan üç yüz kırk guruş ki min-haysü’l-mecmû‘ iki bin yüz yetmiş guruşluk nukūd ve eşyâyı üvey anamız merkūme Gül Nasrâniye bi-gayrı hakkın fuzûlî zabtından mâ‘adâ târih-i i‘lâmdan üç ay mukaddem hâlik olan babamız mersûm Mikâil v. Bogos zimmînin dahi bi’l-cümle terekesine vaz‘-ı yed etmekle gerek karındaşlarımız hâlikân-ı merkūmânın ve gerek babamız hâlik-i mersûmun terekelerinden hisse-i irsiyemizi bi’l-verâse taleb ederiz deyü da‘vâ ve merkūme Gül Nasrâniye cevâbında sâlifü’z-zikr nukūd ve eşyâyı inkârından mâ‘adâ müdde‘iyân-ı merkūmânın babaları hâlik-i merkūm Mikâil zimmî bin iki yüz üç senesi Recebi’l-ferd’inin dokuzuncu günü huzûr-ı şer‘de ben hâlâ ihtiyâr ve alîl olup kâr u kisbe iktidârım olmamağla zevcem merkūmeden altmış guruş iktirâz ve kabz ve ba‘zı eşyâmı dahi âhara bey‘ ve esmânını umûruma sarf edip zevcem merkūme Gül Nasrâniye, güveyim Haçador ve kızım Turfanda Nasrâniye ile mâ‘an sâkin olduğumuz menzil derûnunda kendi mülküm olan bir yorgan ve bir kebe ve bir yasdıkdan mâ‘adâ ism-i mâl ıtlâk olunur nesnem olmayıp zevcem mersûme ile merkūmân Haçador ve Turfanda’nındır deyü târih-i kitâba gelince beynimizde cereyân eden cemî‘ ahz ü i‘tâ ve mu‘âmelât-ı şettâya ve bi’l-cümle hukūk-ı sâireye müte‘allika [âmme-i de]‘âvîden dahi üçümüzün zimmetlerini ibrâ ve ıskāt eylediğini ikrâr ü i‘tirâf edip ve ber-vech-i muharrer târih-i merkūm ile müverraha işbu hüccet-i şer‘iyeyi yedime i‘tâ etmiş idi deyü takrîr-i meşrûhuna mutâbık bir kıt‘a hüccet-i şer‘iyeyi ibrâz eyledikde müdde‘iyân-ı merkūmânın babaları mersûm Mikâil zimmînin hayatında hâlikân-ı merkūmân Hamparsum ve Manuk zimmîlerin terekelerinden adem-i verâsetlerine binâen mîrâs mutâlebeleri meşrû‘a olmayıp ve ba‘dehû mazmûn-ı hüccet-i mezkûre dahi müdde‘iyân-ı merkūmânın ikrârlarıyla sâbit olmağın mûcebiyle müdde‘iyân-ı merkūmân Rapail ve Karabet zimmîlerden her biri husûs-ı merkūmda merkūm[e] Gül Nasrâniyeye bî-vech-i şer‘î mu‘ârazadan men‘ olundukları mübâşiri çavuş kulları iltimâsıyla huzûr-ı âlîlerine i‘lâm olundu. Fî 26 min-Safer sene 1206