Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 583 Hüküm no: 911 Orijinal metin no: [74a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kazer’in beygiri tarafından yaralanan Çakmakçı Ali’nin açtığı davadan vazgeçtiği Ma‘rûz; Medîne-i Üsküdar’da Atpazarı’nda Çakmakcı olup ber-vech-i âtî at ayağıyla meşcûc idiği lede’l-keşf ve’l-mu‘âyene zâhir olan Çakmakcı Ali b. Halil medîne-i mezbûrede meclis-i şer‘-i hatîrde Ekmekci Kazer v. Kiragos nâm zimmî tarafından ber-vech-i âtî tasdîka vekîl olan Destgâhdârı Karabet v. Manuk nâm zimmî muvâcehesinde müvekkil-i merkūm Kazer zimmî medîne-i mezbûrede Köprübaşı’nda vâki‘ değirmeninin kapısını küşâd eylediğinden nâşi değirmen-i mezkûr derûnunda gayr-ı merbût hergele ta‘bîr olunur bir re’s bârgir değirmen-i mezkûrun kapısından Sûk-ı Sultâniye’ye hurûç ve ben târih-i i‘lâm günü değirmen-i mezkûr kurbünde kâin Vâlide-i Cedîd Sebili önünden tarîk-i âmda mezkûr [mürûr] eder iken bârgir üzerime hücûm ve beni yıkıp ve başımın kafasından bir yerinden ayağı ile basıp ol-vechile hâşimeten şecc etmekle mûcib-i şer‘îsini müvekkil-i merkūm Kazer zimmîden taleb ederim deyü eylediği da‘vâsından bâ-tavassut-ı muslihîn yirmi beş guruş bedel-i makbûza sulh olup şecc-i mezkûra ve mâ-yuhdesü minhe müte‘allika âmme-i de‘âvîden müvekkil-i merkūm Kazer zimmînin zimmetini ibrâ ve ıskāt eylediğinde vekîl-i merkūm dahi ber-vech-i muharrer müdde‘î-i merkūmun ibrâsını bi’l-vekâle kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 29 min-S sene 1206