Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 595 Hüküm no: 934 Orijinal metin no: [76a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın vefatından önce alacağını tahsil ettiği Ma‘rûz; Vilâyet-i Anadolu’da Çerkeş kazâsına tâbi‘ Bozoğlu karyesi ahâlisinden olup yirmi iki sene mukaddem vefât eden Mustafa b. Abdullah’ın verâseti zevce-i metrûkesi Kezban bt. Abdullah nâm hatun ile sulbî kebîr oğlu Mehmed’e münhasıra ve tashîh meselesi sekiz sehm i‘tibârıyla bir sehmi zevcesi mezbûreye ve bâkī yedi sehmi oğlu mezbûra isâbeti tahakkukundan sonra mezbûr Mehmed medîne-i Üsküdar’da meclis-i şer‘-i hatîrde Ahmed b. Ahmed nâm kimesne mahzarında mezbûr Ahmed babam müteveffâ-yı mezbûrun hâl-i hayatında yedinden iştirâ ve kabz eylediği kazâ-i mezbûr keyli olmak üzere beher keyli yüzer paradan yirmi keyl arpa semeninden elli guruş hakkını kable’l-ahz vefât edip bize mevrûs olmağla semen-i mezkûrdan ber-tashîh-i merkūm bana isâbet eden hissemi taleb ederim deyü da‘vâ ve mezbûr Ahmed cevâbında müteveffâ-yı mezbûr yedinden beher keyli ikişer guruşa ancak on dört keyl arpa iştirâ ve semeni olan yirmi sekiz guruşun yirmi üç guruşunu müteveffâ-yı mezbûrun hayatında kendi yedine edâ ve teslîm edip mâ‘adâ beş guruşunu kable’l-edâ vefât eyledikde meblağ-ı merkūm beş guruş mukābelesinde müdde‘î-i mezbûra bir tek piştov vermiş idim deyü def‘-i şer‘î birle ziyâde müdde‘âsını inkâr etmeğin dâfi‘-i mezbûr Ahmed def‘-i mezkûrunu beyâna ba‘de’l-havâle müdde‘î-i mezbûr ziyâde müdde‘âsını isbâtdan izhâr-ı acz edip talebiyle mezbûr Ahmed gıbbe’t-tahlîfi’ş-şer‘î mûcebiyle müdde‘î-i mezbûr ziyâde müdde‘âsıyla mezbûr Ahmed’e bilâ-beyyine mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 9 min-Ra sene 1206