Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 598 Hüküm no: 940 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Murtaza b. Hızır’ın uhdesinde olan bostan gediğinin vârislerine intikali esnasında yapılan satışın iptali Ma‘rûz; Fi’l-asl vilâyet-i Rumeli’nde Premedi kazâsı ahâlisinden olup hâlâ medîne-i Üsküdar’da Bulgurlu mahallesinde sâkinler Bağçevân Osman Beşe ve Ali Beşe ibney Murtaza nâm karındaşlar ve âhar li-ebeveyn karındaşları Musa nâm kimesne hâzır olduğu hâlde kendi nefislerinden asâleten ve gāib ani’l-beled li-ebeveyn karındaşları diğer Ali tarafından vekîl-i müsecceli olan mezbûr Osman Beşe vekâleten medîne-i mezbûrede meclis-i şer‘-i hatîrde zikri âtî bostanın nısf gediğine bi’ş-şirâ’ vâzı‘ü’l-yed olan Salih Beşe b. Ebûbekir nâm kimesne mahzarında mahalle-i mezbûrede vâki‘ Karabaş Hanı karşısında vâki‘ ma‘lûmü’l-hudûd bir kıt‘a bostan derûnunda mevcûd beyne’l-esnâf gedik ta‘bîr olunur iki bel ve iki çapa ve iki tarak ve sâir ber-mûceb-i defter-i müfredât âlât-ı lâzıme-i ma‘lûme bundan akdem vefât eden babamız mezbûr Murtaza b. Hızır’ın ile’l-vefât yedinde mülkü ve ba‘de-vefâtihî bizim ile karındaşımız işbu hâzır-ı mezbûr Musa’ya ve âhar karındaşımız gāib-i mezbûr diğer Ali’ye irbâ‘an mevrûs olmuş iken karındaşımız hâzır-ı mezbûr Musa târih-i i‘lâmdan sekiz sene mukaddem mârrü’z-zikr Premedi kazâsında iken cümle gedik benimdir deyü gedik-i mezkûrun nısfını mezbûr Salih Beşe’[ye] iki yüz on guruş semen-i makbûza bey‘ ve teslîm edip lâkin karındaşımız mezbûr Musa’nın gedik-i mezkûrda olan rub‘ hissesinden mâ‘adâ rub‘-ı âhar olan hisse-i mevrûsumuzda olan fuzûlî bey‘ini muhbîr olmamızla rub‘-ı mezkûrdan keff-i yed ve geri bize redd ü teslîme mezbûr Salih’e tenbîh olunmak matlûbumuzdur deyü her biri bi’l-asâle ve bi’l-vekâle da‘vâ etdiklerinde mezbûr Salih Beşe dahi ber-vech-i muharrer ikrâr ü i‘tirâf etmeğin mûcebiyle gedik-i mezkûrda olan bâyi‘-i hâzır-ı mezbûr Musa’nın kendi hisse-i şâyi‘ası olan rub‘ hisse-i şâyi‘a müşterî-i mezbûr Salih Beşe yedinde ba‘de’l-ibkā semen-i meblağ-ı merkūmun nısfı olan yüz beş guruşu müdde‘iyân-ı mezbûrândan bi’l-asâle ve bi’l-vekâle ba‘de’l-ahz ve’l-kabz âhar rub‘ hisse-i şâyi‘adan keff-i yed ve müdde‘iyân-ı mezbûrâna alâ-vechi’ş-şüyû‘ redd ü teslîme mezbûr Salih Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-Ra sene 1206