Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 599 Hüküm no: 941 Orijinal metin no: [76b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marangoz Panayot ile İbrahim Beşe’nin aralarındaki alacak verecek davasında sulh oldukları Ma‘rûz; Medîne-i Üsküdar’da Yenimahalle’de mütemekkin neccâr kalfası Panayot v. Paliste nâm zimmî mahfil-i bâbda meclis-i şer‘-i hatîrde İbrahim Beşe b. Halil mahzarında târih-i i‘lâmdan iki ay mukaddem ben ve sâir neccâr neferâtlarım ile medîne-i mezbûrede Bulgurlu mahallesinde vâki‘ mezbûr İbrahim Beşe’nin ma‘lûmü’l-hudûd bir bâb menzilini emriyle hedm ve müceddeden binâ ve inşâ etmek üzere yetmiş zirâ‘-ı bennâsını elli guruş ücret ile kavl etmiş iken tekrar yetmiş sekiz zirâ‘-ı bennâ dahi inşâ etdirmekle cem‘an yüz kırk sekiz zirâ‘-ı bennâsını müceddeden inşâ ve tekmîl ve ücret-i neccâriyemden zimmetinde müctemi‘ olan yüz iki buçuk guruş hakkımın kırk üç guruşunu yedinden ahz ü kabz ve elli dokuz buçuk guruşu bâkī kalmağla taleb ederim deyü eylediği da‘vâsından bâ-tavassut-ı muslihîn on guruş bedel mukābelesinde mezbûr İbrahim Beşe ile sulh olup ziyâde müdde‘âsı olan kırk dokuz buçuk guruşa ve bi’l-cümle husûs-ı mezkûra müte‘allika âmme-i de‘âvîden mezbûr İbrahim Beşe’nin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 7 min-Ra sene 1206