Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 608 Hüküm no: 959 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hanım’ın kendisine küfreden Adile Hanım’ı affettiği Ma‘rûz; Medîne-i Üsküdar’da Hamzafakih mahallesi sâkinelerinden sâhibe-i arzuhâl mu‘arrefetü’z-zât Rukiye bt. Beşir nâm hatun medîne-i mezbûrede meclis-i şer‘-i hatîrde derûn-ı arzuhâlde ismi mezkûre kezâlik zâtı mu‘arrefe Âdile bt. Abdullah nâm hatun muvâcehesinde mezbûre Âdile Hatun târih-i i‘lâmdan beş gün mukaddem medîne-i mezbûrede Gülfam Hatun mahallesinde vâki‘ kendi menzili önünde bi-gayrı hakkın üzerime durun (odun) ile hücûm ve elfâz-ı kabîha ile şetm ve ırzımı hetk etmekle mûcib-i şer‘îsini mezbûre Âdile Hatun’dan taleb ederim deyü eylediği da‘vâsından bâ-tavassut-ı muslihîn meccânen fâriğa olup husûs-ı mezkûra müte‘allika âmme-i de‘âvîden dahi mezbûre Âdile Hatun’un zimmetini ibrâ ve ıskāt eylediğinde ol dahi ber-vech-i muharrer ibrâsını kabûl ve fî-mâ ba‘d müdde‘iye-i mezbûre Rukiye Hatun’a ta‘arruz ve müdâhale etmemek üzere ta‘ahhüd edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-Ra sene 1206