Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 609 Hüküm no: 960 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Birbiriyle küfürleşen Hatice Hanım ile Adile Hanım’ın sulh oldukları Ma‘rûz; Medîne-i Üsküdar’da Hamza [Fakih] mahallesi sâkinelerinden sâhibe-i arzuhâl mu‘arrefetü’z-zât Hadice bt. Mesud nâm hatun mahfil-i bâbda meclis-i şer‘-i hatîrde derûn-ı arzuhâlde ismi mezkûre kezâlik zâtı mu‘arrefe Âdile bt. Abdullah nâm hatun mahzarında mezbûre Âdile Hatun târih-i i‘lâmdan beş gün mukaddem medîne-i mezbûrede Gülfam Hatun mahallesinde vâki‘ kendi menzili önünde bi-gayrı hakkın bana elfâz-ı kabîha ile şetm ve ırzımı hetk etmekle mûcib-i şer‘îsini mezbûre Âdile Hatun’dan taleb ederim deyü da‘vâ ve mezbûre Âdile hatun dahi cevâbında müdde‘iye-i mezbûre Hadice Hatun’un ber-vech-i muharrer müdde‘âsını bi’l-külliye inkâr eylediğinden mâ‘adâ müdde‘iye-i mezbûre târih-i merkūmda menzil-i mezkûr önünde bi-gayrı hakkın bana elfâz-ı kabîha ile şetm ve menzilimin kapısının halkalarına odun vaz‘ ve işbu hâzır bi’l-meclis sadrî sagīr oğlum İbrahim’in beline depme ile darb etmekle mûcib-i şer‘îsini taleb ederim deyü müdde‘iyetân-ı mezbûretân eyledikleri da‘vâlarından bâ-tavassut-ı muslihîn meccânen fâriğalar olup husûs-ı mezkûra müte‘allika âmme-i de‘âvîden dahi her biri âharın zimmetini ibrâ ve ıskāt ve her biri ber-vech-i muharrer âharın ibrâsını kabûl ve fî-mâ ba‘d müdde‘iyetân-ı mezbûretân dahi birbirilerine ta‘arruz ve müdâhale etmemek [üzere] müte‘ahhidler olup bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 26 min-Ra sene 1206