Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 443 Hüküm no: 475 Orijinal metin no: [106a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zosik bt. Bogos’un Anani v. Manuk’a olan borcunu ödemesine tenbih olunduğu Ma‘rûz. Muhzır Ali mübâşeretiyle Mahkeme-i Bâb’a ihzâr olunan Zosik bt. Bogos nân Nasrâniye muvâcehesinde hasmı Anani v. Manuk nâm zimmî mezbûre Zosik Nasrâniye târih-i i‘lâmdan sekiz ay mukaddem sâkin olduğu menzilinde yedimden otuz beş guruş istidâne ve kabz ve mesârifine sarfla istihlâk etmekle hâlâ meblağ-ı mezbûru taleb ederim deyü da‘vâ eyledikde ol dahi bi’l-külliye inkâr etmeğin müdde‘î-i mesfûr müdde‘âsını Tomas v. Melkon ve Melkon v. Panuk zimmîler şehâdetleriyle [106b] mezbûre Zosik muvâcehesinde vech-i şer‘î üzere isbât etmeğin mûcebince hüküm ve meblağ-ı mezbûr otuz beş guruşu müdde‘î-i mesfûra edâya mezbûre Zosik Nasrâniyeye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 2 Rebî‘ülevvel sene [1]143.