Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 442 Hüküm no: 474 Orijinal metin no: [106a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giresun ağası iken Trabzon’da öldürülen Mustafa Ağa’nın terekesi hususunda vâlidesinin açtığı davada haklı olduğu Bâ-mühr-i hazret-i efendi. Ma‘rûz. Giresun ağası iken katîlen vefât eden Mustafa Ağa b. Halil’in verâseti vâlidesi sâhibe-i arzuhâl Hadice Hatun ile li-üm er karındaşı İsmail ve kız karındaşı İzzethan ve ammi[si] el-Hâc Mustafa’ya inhisârı tahakkukundan sonra merkūme Hadice Hatun asâleten dîvân-ı âlîlerinde ma‘kūd meclis-i şer‘de bundan akdem vefât eden Lehberî demekle ma‘rûf Mehmed Çavuş b. Abdullah’ın oğlu ve terekesine vâzı‘u’l-yed olan Mustafa Çavuş mahzarında oğlum mezbûr Mustafa Çavuş Trabzon’da katlolundukda bi’l-cümle terekesi Trabzon Vâlîsi Abdurrahman Paşa’nın kethüdâsı Cemşidoğlu bi-gayr-ı hakkın ahz ettikden sonra içinden bin yedi yüz elli guruşunu merkūm Mustafa Çavuş’un babası mezbûr Lehberî Mehmed Çavuş’a İstanbul’da olan veresesine îsâl eyle deyü teslîm edip ol dahi ba‘de’l-kabz ve’t-tesellüm İstanbul’a gelirken esnâ-yı tarîkde merkūm Mehmed Çavuş bi-emri’llâhi te‘âlâ vefât edip mezbûr Cemşidoğlu şer‘an gāsıb ve Lehberî Mehmed Çavuş dahi gāsıb-ı gāsıb olmağla binâen-aleyh terekesinden bi-tarîkı’d-damân meblağ-ı mezkûrdan hisse-i irsiyye-i şer‘iyyemi taleb ederim deyü da‘vâ eyledikde merkūm Mustafa Çavuş inkâr etmekle müdde‘iyye-i merkūme Hadice Hatun müdde‘âsını isbât için dîvân-ı âlîlerine getirdiği İstanbul’da Süleymâniye Mahallesi’nde sâkin Mustafa b. Ahmed ve Kıztaşı Mahallesi’nde sâkin gulâm-ı bâki Mustafa b. Ahmed nâm kimesneler fi’l-vâki‘ müdde‘iyye-i mezbûre Hadice Hatun’un oğlu olup Giresun ağası iken Trabzon’da katîlen vefât eden Mustafa Ağa b. Halil’in mâlını Trabzon Vâlîsi Abdurrahman Paşa’nın kethüdâsı Cemşidoğlu bi-gayr-ı hakkın kabz eyledikden sonra maktûl-i mezbûrun mâlından İstanbul’da veresesine îsâl için mezbûr Mustafa Çavuş’un babası Lehberî Mehmed Çavuş b. Abdullah’a bizim huzûrumuzda bin yedi yüz elli guruşunu teslîm ol dahi kabz ve tesellüm eyledi deyü edâ-yı şehâdet-i şer‘iyye ettiklerinde şâhidân-ı mezbûrân mahalleleri ahâlîlerinden ta‘dîl ve tezkiye olunduklarında her biri adl ve makbûlü’ş-şehâde oldukları haber verilip emr-i ta‘dîl ve’t-tezkiye tamam olmağla mûcebiyle ba‘de’l-hükm meblağ-ı mezbûr bin yedi yüz elli guruşdan müdde‘iyye-i mezbûrenin hissesini babası terekesinden teslîme merkūm Mustafa Çavuş’a tenbîh olunduğu huzûr-ı âlîlerine i‘lâm olundu. Fî 3 Rebî‘ülevvel sene [1]143.