Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 613 Hüküm no: 969 Orijinal metin no: [78b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Harputlu Mehmed’in İbrahim Reis’ten alacaklı olduğu yolundaki davasına itibar edilmediği Ma‘rûz; Vilâyet-i Anadolu’da Harput kazâsı ahâlisinden olup hâlâ medîne-i Üsküdar’da misâfiren sâkin Mehmed b. Ömer nâm kimesne medîne-i Üsküdar’da meclis-i şer‘-i hatîrde Akçaşehir reislerinden İbrahim Reis b. İbrahim nâm kimesne muvâcehesinde târih-i i‘lâmdan yedi sene mukaddem gāib ani’l-beled Mustafa Reis nâm kimesneye bilâ-tesmiye-i ücret dört sene hizmetim sebkat etmekle sinîn-i mezkûrede sebkat eden hizmetimin ecr-i mislini gāib-i mezbûr Mustafa’dan kable’l-istifâ mezbûr Mustafa Reis vefât edip işbu mezbûr İbrahim Reis müteveffâ-yı mezbûrun zevcesi Emine Hatun’u tezevvüc eylediğine binâen ecr-i mislimi mezbûr İbrahim’den taleb ederim deyü müdde‘î-i mezbûrun ber-vech-i muharrer takrîri üzere tasaddî eylediği da‘vâ-yı gayr-ı meşrû‘asına iltifât olunmayıp mezbûr İbrahim Reis’e suâl dahi teveccüh etmediği bi’l-iltimâs huzûr-ı âlîlerine i‘lâm olundu. Fî 29 min-Ra sene 1206