Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 613 Hüküm no: 968 Orijinal metin no: [78b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Mustafa’nın borcunu ödemesi Ma‘rûz; Medîne-i Üsküdar’a tâbi‘ İstavros karyesinde sâkine mu‘arrefetü’z-zât Emetullah bt. İsmail Efendi nâm hatun medîne-i mezbûrede mahfil-i bâbda meclis-i şer‘-i hatîrde Hasan Beşe b. Mustafa nâm kimesne mahzarında târih-i i‘lâmdan sekiz sene mukaddem hâl-i sıgārımda babam mezbûr İsmail Efendi’den müntakil bâ-defter-i kassâm mâl-ı nukūd-ı mevrûsemden olmak üzere vâlidem Emine bt. Hasan nâm hatun bi’l-vesâye eniştem Mehmed nâm kimesneye üç yüz guruş idâne ve teslîm edip lâkin eniştem mezbûr Mehmed Ağa’nın dahi mezbûr Hasan Beşe zimmetinde beynlerinde ma‘lûm bir kıt‘a kürûmu mülk bağ semeninden bâkī üç yüz guruş alacak hakkı kalıp üçümüz bir meclisde iken mezbûr Mehmed Ağa beni deyn-i meblağ-ı mezkûr üç yüz guruş ile mezbûr Hasan Beşe üzerine havâle-i mukayyede ile havâle ve her birimiz havâle-i merkūmeyi kabûl eyledikden sonra meblağ-ı merkūmun elli guruşunu mezbûr Hasan Beşe yedinden ahz ü kabz ve iki yüz elli guruşu bâkī zimmetinde kalmağla bi-hükmi’l-havâle hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm iki yüz elli guruşun müdde‘iye-i mezbûre Emetullah Hatun’a bi-hükmi’l-havâle edâsıyla mezbûr Hasan Beşe ilzâm olunduğu bi’l-iltimâs huzûr-ı âlîlerine i‘lâm olundu. Fî 26 min-Ra sene 1206