Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 614 Hüküm no: 971 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İsmail’in borcunu ödemesi Ma‘rûz; Medîne-i Üsküdar’da [Üsküdar’a] tâbi‘ Viran karyesinde vâki‘ mâ-i cârî çeşme mühimmâtı’çün mevkūfe nukūdun mütevellîsi Osman b. Mehmed nâm kimesne mahfil-i bâbda meclis-i şer‘-i hatîrde Mehmed b. İsmail nâm kimesne mahzarında işbu yedimde olan bir kıt‘a hüccet-i şer‘iye nâtıka olduğu üzere bin iki yüz beş senesi şehr-i Rebî‘ülevvelin yirmi altıncı günü mâl-ı vakf-ı mezbûrdan olmak üzere yedimden istidâne ve kabz eylediği iki yüz guruş ve beher sene tamamında bâ-devr-i şer‘î ilzâm ve iltizâm olunan bir senede otuz guruş ve târih-i hüccetden mukaddem zimmetinde bâkī on guruş ki cem‘an iki yüz kırk guruş deyni mukābelesinde emlâkinden olup karye-i mezbûre bağları hilâlinde vâki‘ lede’l-ahâli ve’l-cîrân ma‘lûmü’l-hudûd bir kıt‘a bağını vefâen bana bey‘ u teslîm etmekle fekk-i rehn ile meblağ-ı mecmû‘-ı merkūm iki yüz kırk guruşu vakf-ı mezbûr içün bi’t-tevliye hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı mecmû‘-ı merkūm iki yüz kırk guruşun edâsıyla mezbûr Mehmed ilzâm olunduğu bi’l-iltimâs huzûr-ı âlîlerine i‘lâm olundu. Fî-selh-i Ra sene 1206