Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 616 Hüküm no: 975 Orijinal metin no: [79a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hanım’ın gelini Ümmügülsüm’e ait olan eşyaları iade etmesi Ma‘rûz; Medîne-i Üsküdar’da Debbâğlar mahallesinde sâkine mu‘arrefetü’z-zât Ümmügülsüm bt. Ömer nâm hatun medîne-i mezbûrede mahfil-i bâbda meclis-i şer‘-i hatîrde hâlâ kayınvâlidesi mu‘arrefetü’z-zât Nefise bt. el-Hâc Halil nâm hatun mahzarında mezbûre Nefise Hatun’un oğlu gāib ani’l-meclis Mehmed Emin nâm kimesne iki yüz guruş mehr-i mu‘accel tesmiyesiyle beni tezevvüc ve bana duhûl edip ve meblağ-ı merkūm mehr-i mu‘accelim mukābelesinde olmak üzere bana def‘ ü teslîm ve ben dahi kabz ve tesellüm eylediğim on çatma yasdık ve üç minder ve üç çuka mak‘ad ve bir yo[r]ganım hâlâ kayınvâlidem mezbûre Nefise Hatun’un yedinde bi-a‘yânihâ mevcûde olmağla taleb ederim deyü ba‘de’d-da‘vâ ve’l-istintâk ve’l-ikrâr mûcebiyle eşyâ-i muharrere-i mezkûreyi bi-a‘yânihâ müdde‘iye-i mezbûre Ümmügülsüm Hatun’a teslîme kayınvâlidesi mezbûre Nefise Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 24 min-Ra sene 1206