Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 616 Hüküm no: 976 Orijinal metin no: [79a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hanım’ın muhâlaa yoluyla boşandığı kocasından alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da Selmanağa mahallesinde sâkine mu‘arrefetü’z-zât Nefise bt. Hüseyin nâm hatun medîne-i mezbûrede mahfil-i bâbda meclis-i şer‘-i hatîrde zevc-i sâbıkı es-Seyyid el-Hâc Numan b. es-Seyyid Osman mahzarında ben yirmi guruş mehr-i müeccel tesmiyesiyle mezbûr es-Seyyid el-Hâc Numan’ın zevce-i medhûlün-bihâsı iken târih-i i‘lâmdan üç sene mukaddem İznikmid kasabasında beni tatlîk etmekle meblağ-ı mezbûr yirmi guruş mehrimi hâlâ taleb ederim deyü ba‘de’d-da‘vâ ve’l-istintâk mezbûr es-Seyyid el-Hâc Numan cevâbında fi’l-hakīka müdde‘iye-i mezbûre mukaddemâ ber-vech-i muharrer zevcesi olduğunu ikrâr lâkin târih-i merkūmda müdde‘iye-i merkūme mehr-i müeccel-i mezkûresi üzerine benim ile muhâla‘a-i sahîha-i şer‘iye ile hul‘ olup hukūk-ı zevciyete müte‘allika âmme-i de‘âvîden dahi zimmetimi ibrâ edip hattâ târih-i i‘lâmdan bir sene mukaddem huzûr-ı Müslimînde ikrâr dahi etmiş idi deyü müdde‘iye-i merkūmenin ber-vech-i muharrer ikrâr-ı meşrûhunu Ali Efendi b. Mahmud nâm kimesne ile nisâ tâifesinden Hadice bt. Hüseyin ve Emetullah bt. Mehmed nâm hatunlar şehâdetleriyle ber-nehc-i şer‘î isbât etmeğin mûcebiyle müdde‘iye-i mezbûre Nefise Hatun husûs-ı mezkûrda zevc-i sâbıkı mezbûr es-Seyyid el-Hâc Numan’a bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 29 min-Ra sene 1206