Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 444 Hüküm no: 477 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un daha önceden Ali’nin zimmetini ibra ettiği için açtığı davanın hükümsüz olduğu Ma‘rûz. Derûn-ı arzuhâlde mezkûretü’l-ism Fâtıma nâm hatun meclis-i şer‘de sâhib-i arzuhâl Ali mahzarında İstanbul’da Mercan sûkunda vâki‘ bir bâb gözlemeci dükkânında mevcûd gözlemeci âlâtının nısf-ı şâyi‘i benim olmağla mukaddemâ mezbûr Ali’ye gedik nâmıyla doksan iki [-guruş] verip gedik-i mezbûru yine mezbûr Ali’ye beher yevm onar akçe icâre ile îcâr eylediğimden sonra ücret-i mezkûreyi bundan akdem mezbûr Ali’den bi’d-defa‘ât da‘vâ eylediğimde gedik-i mezbûrun îcâr ve istîcârı sahîh olmamağla mu‘ârazadan men‘ olunduğuma binâen hâlâ mezbûr Ali’den meblağ-ı mezbûr doksan iki guruşu taleb ederim deyü da‘vâ eylediğinde mezbûr Ali husûs-ı mezbûru bi’l-külliye inkâr eylediğinden mâ‘adâ müdde‘iyye-i mezbûre bundan akdem meblağ-ı mezbûr doksan iki guruşa ve sâire müte‘allika âmme-i da‘vâdan beni ibrâ ve iskāt etmişdir deyü mazmûnu min-külli’l-vücûh takrîrine mutâbık bir kıt‘a hüccet-i şer‘iyye ile bir kıt‘a i‘lâm ibrâz eyledikde mezbûre Fâtıma dahi mazmûn hüccet-i mezbûre ile i‘lâm-ı mezkûru ikrâr u i‘tirâf etmeğin ıkrârı mûcebince müdde‘iyye-i mezbûre merkūm Ali’ye bî-vech mu‘ârazadan men‘ olunduğu Mahkeme-i Bâb’da ba‘de’t-tescîl bi’l-iltimâs huzûr-ı âlîlerine i‘lâm olundu. Fî 4 Rebî‘ülevvel sene [1]143.