Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 444 Hüküm no: 478 Orijinal metin no: [106b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar tâifesinden Yahûdi Yuda’nın uyarılması Ma‘rûz. Attâr tâifesinin kethüdâları el-Hâc Osman ve yiğitbaşıları Mustafa ve erbâbından cemm-i gafîr Müslimîn meclis-i şer‘de yine attâr tâifesinden Mahmudpaşa’da sâkin Yuda v. Yako nâm Yahûdi’yi Bâb Mahkemesi’ne ihzâr ve muvâcehesinde kadîmü’l-eyyâmdan bu ana gelince tüccâr tâifesinin İstanbul’a getirdikleri darçın ve karanfil ve sâir metâ‘ımız kethüdâ ve yiğitbaşı ve ihtiyârlar ma‘rifetiyle pazar ve mu‘tâd-ı kadîm üzere beynimizde tevzî‘ ve taksîm olunup bu vech üzere yedimizde olan evâmir-i aliyye mantûklarınca nizâm verilmişiken merkūm Yahûdi kadîme mugāyir ve evâmir-i aliyyelere muhâlif hufyeten tüccâr tâifesinden iştirâ etmekle nizâmımızın ta‘tîl ve ihtilâline bâ‘is vaz‘ u hareket eder deyü teşekkî eyledikde min-ba‘d kadîme mugāyir ve evâmir-i aliyyelere muhâlif vaz‘ u hareket etmemek üzere merkūm Yahûdi’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 5 Rebî‘ülevvel sene [1]143.