Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 626 Hüküm no: 993 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Hüseyin Efendi’nin bulunduğu mahalleden ihracı Ma‘rûz; Medîne-i Üsküdar’da Sinanpaşa mahallesi İmâmı es-Seyyid Abdurrahim Efendi b. Mehmed Nurullah ve Cafer Efendi b. Müezzin ( ) ve Müezzin Molla Ahmed b. Mahmud ve ahâlisinden es-Seyyid Mehmed Efendi b. Mehmed Emin ve Mustafa b. Musa ve Mehmed b. Süleyman nâm kimesneler meclis-i şer‘-i hatîrde Hafız Hüseyin Efendi b. Ahmed nâm kimesne mahzarında mezbûr Hafız Hüseyin Efendi imâm vekîli olmayıp mahalle-i mezbûrede vâki‘ âhar câmi‘-i şerîfde imâm vekîli olmak hasebiyle mahalle-i mezbûre umûruna karışdığından mâ‘adâ ba‘zı ashâb-ı menâzile ifk ü iftirâ ve her birine birer bahâne ile tekdîr ve ırzımızı dahi hetk eyleyip hattâ târih-i i‘lâmdan üç gece mukaddem ahâli-i mahallemizden hâzır bi’l-meclis Selim Ağa nâm kimesnenin menzilinde fâhişe avrat var deyü Salacak bölükbaşısıyla menzil duvarından aşıp ve menzil-i mezkûrda menhiyâtdan dahi bir nesne bulunmayıp ol-vechile mezbûr Süleyman Ağa’nın ırzını hetk etmekle kendinden bi’l-külliye emn ü rahatımız meslûb olmuşdur deyü harekât-ı nâ-marzıyyesini bi’l-muvâcehe ihbâr birle teşekkî ve mahalle-i mezbûreden ihrâc olunmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 6 min-R sene 1206