Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 627 Hüküm no: 994 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed ile Abdurrahman b. Abdülkerim’in aralarındaki alacak verecek davasında sulh oldukları Ma‘rûz; Medîne-i Üsküdar’da Kefçe mahallesinde sâkin Mehmed Emin b. Ahmed nâm kimesne medîne-i mezbûre mahkemesinde meclis-i şer‘-i hatîrde Abdurrahman b. Abdülkerim nâm kimesne mahzarında târih-i i‘lâmdan on sene mukaddem mezbûr Abdurrahman’ın emriyle âhardan kendi nefsi’çün iştirâ ve yedine teslîm eylediğim vezn ve fiyâtı beynimizde ma‘lûm dakīk ve revgan-ı sâde ile kezâlik fiyâtı beynimizde ma‘lûm çuka semenlerinden bâkī ba‘de-külli’l-hesâb altmış yedi guruş zimmetinde hakkım olmağla taleb ederim deyü eylediği da‘vâsından bâ-tavassut-ı muslihîn on iki guruş bedel-i makbûza mezbûr Abdurrahman ile sulh olup ziyâde müdde‘âsı olan elli beş guruşa ve bi’l-cümle husûs-ı mezkûra müte‘allika âmme-i de‘âvîden mezbûr Abdurrahman’ın zimmetini ibrâ ve ıskāt eylediğinde ol dahi kezâlik müdde‘î-i mezbûrun emriyle zevcesi gāibetü ani’l-meclis Hadice nâm hatuna âhardan iştirâ ve teslîm eylediği mecmû‘-ı kıymetleri kırk yedi buçuk guruşa bâliğ on iki zirâ‘ muhabbethâne ve beş değirmi yemeni ve dokuz değirmi basma yemeni ücreti ile menzilimde ücret kavlinsiz üç ay sâkin olmalarıyla menzil-i mezkûrun ecr-i misli ile eşyâ-i muharrere-i mezkûrenin kıymetleri olan meblağ-ı merkūm kırk yedi buçuk guruş da‘vâsından meccânen fâriğ olup husûs-ı mezkûra müte‘allika âmme-i de‘âvîden müdde‘î-i mezbûr Mehmed Emin’in zimmetini ibrâ ve ıskāt ve her biri ber-minvâl-i muharrer âharın ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 6 min-S sene 1206