Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 628 Hüküm no: 996 Orijinal metin no: [81a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ali’nin omuzu başındaki kemiğini kıran Ahmed b. Mehmed ile diyeti karşılığında sulh olduğu Ma‘rûz; Medîne-i Üsküdar’da Ayazma mahallesinde dökmeci dükkânında dökmeci kalfası olup ber-vech-i âtî sol omuzu başından dökme sahan darbıyla omuzu azmı meksûr idiği bundan akdem lede’l-keşf ve’l-mu‘âyene zâhir olan Ali b. Ali nâm kimesne meclis-i şer‘-i hatîrde refîki Ahmed b. Mehmed mahzarında mezbûr Ahmed târih-i i‘lâm gecesi mâ‘an sâkinler olduğumuz dükkân-ı mezkûr derûnunda bi-gayrı hakkın amden dökme sahan ile sol omuzum başından darb etmekle mûcibini taleb ederim deyü eylediği da‘vâsından bâ-tavassut-ı muslihîn mezbûr Ahmed ile üç guruş bedel-i makbûza sulh olup cerh-i mezkûra ve mâ-yuhdesü minhe müte‘allika âmme-i de‘âvîden mezbûr Ahmed’in zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 28 min-Ra sene 1206