Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 627 Hüküm no: 995 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe ile Mehmed Ağa’nın aralarındaki alacak verecek davasında sulh oldukları Ma‘rûz; Medîne-i Üsküdar’a tâbi‘ Kādı karyesi sükkânından İbrahim Beşe b. İsmail nâm kimesne medîne-i mezbûrede mahfil-i bâbda meclis-i şer‘-i hatîrde el-Hâc Mehmed Ağa b. Ömer nâm kimesne mahzarında mezbûr el-Hâc Mehmed bundan akdem karye-i mezbûrede subaşı olup ben dahi ücret ile hizmet eder makūlesinden olmamla talebiyle ücret kavlinsiz sekiz ay yasakcılık hizmetini rü’yet etmemle şühûr-ı mezkûrede sebkat eden hizmetimin ecr-i mislini taleb ve da‘vâ eylediğimde beynimize muslihûn tavassut edip beni da‘vâ-yı mezkûremden mezbûr el-Hâc Mehmed Ağa ile elli guruş bedel mukābelesinde sulh eylediklerinde ben dahi sulh-ı mezkûru kabûl ve bedel-i sulh olan meblağ-ı merkūm elli guruşu beynimizde ma‘lûm yedinden iştirâ eylediğim kākım kürk semeninden zimmetimde deynim olan yüz on guruşun elli guruşuna mahsûb ve takas eylediğimde ol dahi mukāssa ve kabûl etmeğin fî-mâ ba‘d şühûr-ı mezkûrede sebkat eden hizmetimin ecr-i misline müte‘allika âmme-i de‘âvîden mezbûr el-Hâc Mehmed Ağa’nın zimmetini ibrâ ve ıskāt eylediğimde ol dahi ibrâmı kabûl eyledi dediğini mezbûr el-Hâc Mehmed Ağa tasdîk edip kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fi 23 min-Ra sene 1206