Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 638 Hüküm no: 1016 Orijinal metin no: [82b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa ile Zenci Abdullah’ın aralarındaki alacak verecek davasında sulh oldukları Ma‘rûz; Mahmiye-i İslâmbol’da Langa Bostanı kurbünde sâkin mu‘tak Zenci Abdullah medîne-i Üsküdar’da mahfil-i bâbda meclis-i şer‘-i hatîrde Sâbıkā kendiye rıkkıyetle vaz‘-ı yed eden Haseki el-Hâc İsmail Ağa b. Ali mahzarında târih-i i‘lâmdan bir sene mukaddem mezbûr el-Hâc İsmail Ağa medîne-i mezbûre hâricinde İbrahim Ağa Zâviyesi karyesinde vâki‘ ma‘lûmü’l-hudûd ve’l-müştemilât taht-ı tasarrufunda olan bir bâb vakıf menzilinin nısfını sana ma‘rifet-i mütevellî ferâğ ederim gel benim ile mâ‘an sâkin ol deyü beni menzilinde iskân esnâsında emlâkimden mecmû‘-ı kıymetleri altmış yedi buçuk guruşa bâliğ bir yeşil çuka biniş ve iki şalî entari ve bir şilte ve bir duhân çubuğu ve bir çift mest pabucumu kendiye ilbâs ve i‘tâ eylediğimden sonra bi-şarti’r-rücû‘ emriyle menzilinin ta‘mîr ü term[î]mine ve sâir mesârifine mâlımdan sarf eylediğim yüz üç guruş ki cem‘an yüz yetmiş buçuk guruş zimmetinde hakkım olmağla hâlâ taleb ederim deyü eylediği da‘vâsından bâ-tavassut-ı muslihîn altı guruş ile bir yeşil çuka biniş ve bir beyaz şalî entari bedel-i makbûz mukābelesinde mezbûr el-Hâc İsmail Ağa ile sulh olup husûs-ı mezkûra ve bi’l-cümle ziyâde müdde‘âsına ve hukūk-ı sâireye müte‘allika âmme-i de‘âvîden mezbûr el-Hâc İsmail Ağa’nın zimmetini ibrâ ve ıskāt eyledikde ol dahi medfû‘u olan bedel-i merkūm altı guruşa ve mârrü’z-zikr biniş ve entariye ve bi’l-cümle hukūk-ı sâireye müte‘allika âmme-i de‘âvîden mezbûr Zenci Abdullah’ın zimmetini ibrâ ve ıskāt ve her biri ber-vech-i muharrer âharın ibrâsını kabûl edip bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 8 min-R sene 1206