Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 646 Hüküm no: 1031 Orijinal metin no: [84a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beziryağcı esnafının nizama aykırı satış yapan Lazari v. Yorgi’nin meslekten ihrac edilmesi talebinde bulundukları Ma‘rûz; Medîne-i Üsküdar’da beziryağcı esnâfından İstako v. Tarandafil ve Foti v. Polihron ve Kostanti v. İstornos ve Gülistan v. Sava ve Mavriz v. İstirati ve Anderya v. Todori ve Kostanti v. Praşkova ve Hıristodolos v. İstikoz ve Praşkova v. Manyad ve Mihail v. İstati ve Prekop v. İstati nâm zimmîler meclis-i şer‘-i hatîrde Lazari v. Yorgi nâm zimmî muvâcehesinde merkūm Lazari zimmî esnâfımızdan olup medîne-i mezbûrede Balaban İskelesi kurbünde bir mahzen istîcâr ve derûnunda köftün bey‘ edip lâkin merkūm Lazari kendi hâlinde olmayıp müfsid ve müteharrik olmağla taşradan metâ‘ımız geldikde kā‘ide üzerine gümrüğünü mahâlline edâ eder iken merkūm Lazari kemâl-i hîlesinden nâşi hilâf-ı vâki‘ ziyâde metâ‘ iştirâ eylediler deyü bizi gamz ve tecrîm ve ızrâr etmekle merkūmdan emniyetimiz meslûb olmuşdur deyü irtikâb ve ifsâdını muvâcehesinde ihbâr ve esnâf-ı mezkûreden ihrâc olunmak bâbında fermân-ı âlîleri sudûrunu her biri istid‘â ve istirhâm eyledikleri bi’l-iltimâs huzûr-ı âlîlerine i‘lâm olundu. Fî 12 min-R sene 1206