Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 646 Hüküm no: 1032 Orijinal metin no: [84a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beziryağcı esnafından olup nizama aykırı satış yapan Lazari v. Yorgi’nin nizama uymak üzere kefalete bağlandığı Ma‘rûz; Medîne-i Üsküdar’da beziryağcı esnâfından İstako v. Tarandafil ve Foti v. Polihron ve Kostanti v. İstornos ve Gülistan v. Sava ve Mavriz v. İstirati ve Anderya v. Todori ve Kostanti v. Praşkova ve Hıristodolos v. İstikoz ve Praşkova v. Manyad ve Mihail v. İstati ve Prekop v. İstati nâm zimmîler meclis-i şer‘-i hatîrde Lazari v. Yorgi nâm zimmî muvâcehesinde merkūm Lazari zimmî esnâfımızdan olup medîne-i mezbûrede Balaban İskelesi kurbünde bir mahzen istîcâr ve derûnunda köftün bey‘ edip lâkin merkūm Lazari kendi hâlinde olmayıp müfsid ve müteharrik olmağla taşradan metâ‘ımız geldikde kā‘ide üzere gümrüğünü mahâlline verirken merkūm Lazari kemâl-i hîlesinden nâşi hilâf-ı vâki‘ ziyâde metâ‘ iştirâ eylediler deyü bizi gamz ü tecrîm ve ızrâr etmekle merkūmdan emniyetimiz selb olmuşdur deyü irtikâb ve ifsâdını muvâcehesinde ihbâr ve esnâf-ı mezkûreden ihrâcını iltimâs etmiş idik lâkin beynimize muslihûn tavassut edip merkūm Lazari fî-mâ ba‘d kendi hâlinde olup bi-gayrı hakkın bir kimesneyi gamz etmeyip ve esnâf-ı mezkûrenin beynlerinde mer‘î ve mu‘teber olan nizâm-ı kadîmlerine muhâlif hareket etmemek üzere ta‘ahhüd ve işbu hâzırûn bi’l-meclis olan şerîki İsmail Beşe b. Mustafa nâm kimesne ile İstirati v. Mihal ve Hıristo v. Yuvan nâm zimmîlerden her biri tekeffül eylediklerinde biz dahi kefâletlerini kabûl ve bu vechile kat‘-ı husûmet eyledik dediklerini merkūm Lazari zimmî tasdîk edip beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 15 min-R sene 1206