Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 649 Hüküm no: 1037 Orijinal metin no: [84b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm Hanım’ın borcunu ödemesi Ma‘rûz; Medîne-i Üsküdar’da Hasanağa mahallesinde sâkine ve zâtı mu‘arrefe Emetullah bt. Ali nâm hatun meclis-i şer‘-i hatîrde kezâlik zâtı mu‘arrefe Şerife Ümmügülsüm bt. es-Seyyid Mustafa mahzarında mezbûre Şerife Ümmügülsüm târih-i i‘lâmdan bir sene mukaddem yedimden iktirâz ve kabz ve umûruna sarfla istihlâk eylediği otuz guruş hakkımın yirmi guruşunu yedinden ahz ü istifâ ve on guruşu zimmetinde bâkī kalmağla meblağ-ı bâkī-i merkūm on guruşu hâlâ taleb ederim deyü da‘vâ ve mezbûre Şerife Ümmügülsüm Hatun cevâbında müdde‘iye-i mezbûreye ol-mikdâr deyni olduğunu ikrâr lâkin kabzını mu‘terife olduğu yirmi guruşdan mâ‘adâ on guruşu dahi müdde‘iye-i mezbûre Emetullah Hatun’a edâ ve teslîm etmiş idim deyü ba‘de’d-def‘ ve’l-inkâr mezbûre Şerîfe Ümmügülsüm Hatun def‘-i mezkûrunu isbâtdan izhâr-ı acz edip tahlîfe dahi tâlibe olmamağla alâ-mûcebi ikrârihi meblağ-ı bâkī-i merkūm on guruşu müdde‘iye-i mezbûre Emetullah Hatun’a teslîme mezbûre Şerife Ümmügülsüm Hatun’a tenbîh olunduğu bi’l-iltimâs huzûr-ı âlîlerine i‘lâm olundu. Fî 26 min-R sene 1206