Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 649 Hüküm no: 1036 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Hasan’ın Ahmed b. Osman’dan alacaklı olduğu yolundaki iddiasını ispatlayamadığı Ma‘rûz; Kalyoncu tâifesinden Hasan b. Hasan medîne-i Üsküdar’da mahfil-i bâbda meclis-i şer‘-i hatîrde Ahmed b. Osman mahzarında bundan akdem mezkûr Ahmed’in bağında üç ay hizmet edip ücretimden zimmetinde müctemi‘a olan kırk beş guruşun on beş guruşunu yedinden ahz otuz guruşu zimmetinde bâkī kalmağla taleb ederim deyü da‘vâ ve mezbûr Ahmed cevâbında mukaddemâ mezbûr Hasan tarafından vekîli Osman b. Mehmed nâm kimesne benden meblağ-ı bâkī-i merkūmu da‘vâ ve bâ-tavassut-ı muslihîn benim ile on beş guruş bedel-i makbûza sulh olup ben dahi sulh-ı merkūmu kabûl ve ziyâde müdde‘âsına müte‘allika âmme-i de‘âvîden benim zimmetimi ibrâ ve ıskāt ben dahi ibrâsını kabûl etmiş idim deyü takrîrine mutâbık bir kıt‘a i‘lâm ibrâzıyla ba‘de’d-def‘ ve’l-inkâr dâfi‘-i mezbûr def‘-i mezkûrunu ve mazmûn-ı i‘lâmı Ahmed b. İbrahim ve İbrahim b. Mustafa nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘î-i mezbûr husûs-ı mezkûrda mezbûr Ahmed’e bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 7 min-Ra sene 1206