Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 651 Hüküm no: 1042 Orijinal metin no: [85a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe ile Yakub b. İsmail arasındaki alacak verecek davasının halledilmesi Ma‘rûz; Medîne-i Üsküdar’da Arakıyeci el-Hâc Cafer mahallesinde sâkin İsmail Beşe b. el-Hâc Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Yakub b. İsmail nâm kimesne mahzarında târih-i i‘lâmdan altı ay mukaddem ba-ferâğ-ı menzil mezbûr Yakub yedimden istidâne ve kabz ve umûruna sarfla istihlâk eylediği yüz yir[mi] guruş ve bir def‘a dahi istidâne eylediği otuz beş guruşdan bâkī on beş guruş ki cem‘an yüz otuz beş guruş zimmetinde hakkım olmağla menzil-i mezkûru rehniyetden ba‘de’l-fekk meblağ-ı mecmû‘-ı merkūm yüz otuz beş guruşu hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı mecmû‘-ı merkūm yüz otuz beş guruşun müdde‘î-i mezbûra edâ ve teslîme mezbûr Yakub’a ve menzil-i mezkûru rehniyetden fekke müdde‘î-i mezbûr İsmail’den her birine tenbîh olunduğu bi’l-iltimâs huzûr-ı âlîlerine i‘lâm olundu. Fî 24 min-R sene 1206