Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 652 Hüküm no: 1044 Orijinal metin no: [85a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Malome’nin terekesinden borcunun ödenmesi Ma‘rûz; Medîne-i Üsküdar’a tâbi‘ Kandilli karyesinde mütemekkine ve şahsı mu‘arrefe Yakut bt. Mikâil nâm Nasrâniye meclis-i şer‘-i hatîrde karye-i mezbûrede mütemekkin iken bundan akdem hâlik olan Bağçevân Malome v. ( ) nâm zimmînin verâseti zevce-i metrûkesi İstamati bt. Yorgi Nasrâniye ile sulbiye kebîre kızları Katrine ve Panayotam ve sulbiye sagīre kızı Mariya ve sagīr oğlu Dimitri’ye münhasıra ve terekesine vaz‘-ı yedleri mütehakkık olan şahısları mu‘arrefe zevce-i merkūme İstamati kendi nefsinden asıl ve sagīrân-ı merkūmânın vasîleri olmağla vesâyeten ve merkūmetân Katrine ve Panayotam mahzarlarında merkūmânın mûrisleri hâlik-i merkūm Malome hayatında oğlum gāib ani’l-meclis Bedros zimmîye deyni olan seksen guruşu bana havâle ve hattâ bin iki yüz iki senesi Zilhicce’si gurresi târihiyle müverrah ve karz ünvânıyla mu‘anven yedime i‘tâ eylediği bir kıt‘a temessük mantûkunca seksen guruş hakkımın dört guruşunu ahz ve bâkī yetmiş altı guruşunu kable’l-edâ hâlik olmağla hâlâ terekesinden taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre ber-vech-i muharrer müdde‘âsını karye-i mezbûre sükkânından es-Seyyid el-Hâc Abdi Reis b. Mehmed ve Müezzin Abdullah b. Hüseyin nâm kimesneler şehâdetleriyle ba‘de’l-isbât merkūme Yakut Nasrâniye gıbbe’t-tahlîfi’ş-şer‘î mûcebiyle meblağ-ı bâkī-i merkūm yetmiş altı guruşu müdde‘iye-i merkūme Yakut Nasrâniye’ye edâ ve teslîme merkūmât İstamati ve Katrine ve Panayotam Nasrâniyelerden her birine tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-R sene 1206