Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 654 Hüküm no: 1048 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın Tablakâr Mardıros’tan alacaklı olduğu yolundaki iddiasını ispatlayamadığı Ma‘rûz; Medîne-i Üsküdar’da İhsaniye mahallesinde sâkin Ali Ağa b. Mehmed nâm kimesne mahfil-i bâbda meclis-i şer‘-i hatîrde medîne-i mezbûrede Eski Hamam fırınında mütemekkin Tablakâr Mardıros v. Artin nâm zimmî muvâcehesinde târih-i i‘lâmdan altı ay mukaddeme gelince merkūm Mardıros zimmî bana bey‘ eylediği nân-ı azîz semeninden zimmetimde terâküm eden altmış beş guruş deynimi benden mutâlebe ve ben dahi kendiye tamamen edâ ve teslîm etmiş iken deyn-i meblağ-ı merkūm altmış beş guruşa mahsûb olmak üzere zevcem gāibetü ani’l-meclis Âişe nâm hatun yedinden dahi otuz guruş ahz etmekle ziyâde medfû‘um olan otuz guruşu hâlâ istirdâd ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyân ve isbâta kādir olamayıp talebiyle merkūm Mardıros zimmîye yemîn teklif olundukda yemînden nükûl etmeğin mûcebiyle ziyâde makbûzu olan otuz guruşu müdde‘î-i mezbûr Ali Ağa’ya redd ü teslîme merkūm Mardıros zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 22 min-şehri [Rebî‘ülevvel] sene 1206