Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 654 Hüküm no: 1047 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Ahmed’in para ve kıymetli eşyalarının çalındığı iddiasını ispatlayamadığı Ma‘rûz; Medîne-i Üsküdar’da Yeniçeşme kurbünde vâki‘ bağçede bağçevân tâifesinden Arnabud Ahmed b. Hasan meclis-i şer‘-i hatîrde yine bağçevân tâifesinden Ali b. Osman mahzarında mezbûr Ali refîkim olup bağçe-i mezkûre odasında mâ‘an beytûtet etmemizle târih-i i‘lâmdan bir sene mukaddem zikr olunan odada emlâkimden on iki guruş kıymetli sâye nîmten yakasından menşur elli guruş kıymetli sîm düğmelerimi kat‘ ve bi-gayrı hakkın ahz eylediğinden mâ‘adâ yine iki gün mukaddem kesem derûnunda mevcûd olan nakden dört guruşumu ahz ile istihlâk etmekle zikr olunan sîm düğmelerinin kıymetleri olan elli guruş ve nakd-i merkūm dört guruş ki cem‘an elli dört guruş ile sâye semeninin noksân-ı kıymetini mezbûr Ali’den taleb ederim deyü ba‘de’d-da‘vâ ve’l-istintâk ve’l-inkâr müdde‘î-i mezbûr ber-vech-i muharrer müdde‘âsını beyândan izhâr-ı acz edip tahlîfe dahi tâlib olmamağla müdde‘î-i mezbûr Ahmed husûs-ı merkūm içün mezbûr Ali’ye bilâ-beyyine bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 14 min-Ra sene 1206