Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 453 Hüküm no: 495 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Genç Mehmed Paşazâde Hanı’nın eski hancısı Araboğlu Sava’nın kendi halinde olmadığından handan çıkarılması Ma‘rûz. Vârid olan fermân-ı âlîlerine imtisâlen savb-ı şer‘den irsâl olunan Mevlânâ Osman Efendi dâ‘îleri taraf-ı âlîlerinden mübâşir ta‘yîn buyrulan Süleyman Çavuş kulları ile derûn-ı arzuhâlde mezkûr Kitâbçılar kurbünde vâki‘ merhûm Genç Mehmed Paşazâde demekle ma‘rûf hana varıp akd-i meclis-i şer‘ ettikde hân-ı mezkûrda sâkin sâbıkā hân-ı mezkûr hancısı olan Araboğlu Sava v. Yuvan nâm zimmînin keyfiyet-i ahvâli hân-ı mezkûrda sâkin tüccâr tâifesinden olup isimleri cerîdede mazbût olan altı nefer Müslimîn ile dört nefer zimmîden tefahhus olundukda merkūm Araboğlu Sava kendi hâlinde olmayıp dâimâ meyhânecilik ve kârhânecilik eylediğinden gayrı ta‘annüden hân icâresini artırıp ibâdullâha ızrâr âdet-i müstemirresi olduğundan mâ‘adâ sâbıkā hân-ı mezkûrda hancı iken emvâl ve eşyâmız sirka olunmağla cümlemiz merkūm Sava’nın ef‘âl ve akvâlinden mutazarrır ve bir vechile kendiden emîn ve râzı ve hoşnûd değilleriz deyü teşekkî ve sû-i hâlini muvâcehesinde ihbâr ve hân-ı mezkûrdan ihrâc olunmasını her biri iltimâs edip ve hâlâ hân-ı mezkûrun hancıları olan Ayvaz ve şerîki Serkiz’den cümlemiz râzı ve emîn ve hoşnûdlarız deyü kendi hâllerinde olduklarını ba‘de’l-ihbâr vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Mehmed ve Muhzır Abdullah ile meclis-i şer‘a gelip alâ-vukū‘ihî inhâ ve takrîr eyledikleri huzûr-ı âlîlerine i‘lâm olundu. Fî 11 Rebî‘ülevvel sene [1]143.