Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 452 Hüküm no: 494 Orijinal metin no: [108b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin Avadik’e sattığı katırın kusurunu önceden söylediği Ma‘rûz. Muhzır Mehmed mübâşeretiyle Bâb Mahkemesi’ne ihzâr olunan Ahmed Efendi’den hasmı Avadik zimmî meclis-i şer‘de işbu müşâhede olunan siyah katırı cemî‘ uyûbdan sâlim olmak üzere târih-i i‘lâmdan sekiz gün mukaddem otuz üç guruş semen-i medfû‘ ve makbûza bana bey‘ ben dahi ber-vech-i muharrer iştirâ etmişidim hâlâ zikrolunan katırın mankafa sıracası ayıbı ile mu‘ayyebe ve kadîm olmağla red semen-i mezkûru taleb ederim deyü da‘vâ ettikde evvelâ teveccüh-i husûmet için taraf-ı saltanat-ı aliyyeden ehl-i hibre ta‘yîn olunan Ahmed Çelebi b. İvaz ve Hasan b. Receb nâm kimesnelere irâet olundukda onlar dahi ba‘de’n-nazar meclis-i şer‘a gelip zikrolunan katırın mankafa sıracası ayıbı kadîm ve inde’t-tüccâr noksan semen îcâb eder uyûbdan olduğunu ba‘de’l-ihbâr mezbûr Ahmed Efendi istintak olundukda mârru’z-zikr katırı müdde‘î-i mezbûra bey‘ ve teslîm eyledikde ol dahi ber-vech-i muharrer cemî‘ uyûbuyla iştirâ ve kabûl eyledi deyü da‘vâyı def‘ ve def‘-i mezkûrunu adâletleri zâhir olan Şekerciler Hanı’nda sâkin Hancı Mehmed Beşe b. Osman ve Ahmed Beşe b. Mehmed nâm kimesneler şehâdetleriyle isbât etmeğin mûcebince mezbûr Avadik zimmî bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 13 Rebî‘ülevvel sene [1]143.