|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 256 Hüküm no: 359 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
el-Hâc Osman’ın borcu olduğu
Vilâyet-i Anadolu’da Bilecik nâm kasaba sükkânından bâ‘isü’l-kitâb el-Hâ[c] Pîrî b. Süleyman nâm kimesne meclis-i şer‘-i hatîr-i lâzımü’t-tevkīrde el-Hâc [Osman] b. Ömer mahzarında da‘vâ ve takrîr-i kelâm edip yedimden müşterâ ve makbûz Bilecik yasdığı bahâsından mezbûr el-Hâc Osman zimmetinde altmış beş riyâlî guruş-ı kebîr hakkım vardır, suâl olunup alıverilmesi matlûbumdur dedikde gıbbe’s-suâl mezbûr el-Hâc Osman cevâbında fi’l-hakīka müdde‘î-i mezbûr el-Hâc Pîrî’ye ber-vech-i muharrer üzere yasdık bahâsından zimmetimde altmış beş riyâlî guruş lâzımü’l-edâ ve vâcibü’l-kazâ deynim vardır deyü tav‘an ikrâr u i‘tirâf etmeğin ikrârı mûcebince meblağ-ı mezbûr altmış riyâlî guruşu merhûm el-Hâc Pîrî’ye edâ ve teslîme mezbûr el-Hâc Osman’a tenbîh-birle mâ-hüve’l-vâki‘ bi’t-taleb ketb olundu.
Fi’l-yevmi’s-sâmin aşer min-Cemâziyelâhire li-sene erba‘a ve sittin ve elf.
Şuhûdü’l-hâl: İbrahim Çelebi b. Davud, Pîrî b. Hüseyin, Rıdvan [b.] Abdullah, Ali Beşe b. Abdullah çukadâr, Ramazan b. Yusuf.
|