Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 454 Hüküm no: 497 Orijinal metin no: [108b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun ile Rahime ve kocası Ahmed Çelebi’nin aralarındaki davada sulh oldukları Ma‘rûz. Sâdır olan fermân-ı âlîlerine imtisâlen kıbel-i şer‘-i şerîfden irsâl olunan keşif nâibimiz Abdurrahman Efendi dâ‘îleri hâssa mi‘mârlarından Ali b. Ahmed ve Ahmed b. Mehmed nâm halîfeler ile İstanbul’da Hammâmî Muhyiddin Mahallesi’nde vâki‘ mahall-i nizâ‘a varıp ba‘de akd-i meclis sâhibe-i arzuhâl Râbia Hatun bt. Zevkî el-Hâc Mehmed meclis-i ma‘kūd-ı mezkûrda derûn-ı arzuhâlde mezkûre Rahime bt. Abdullah ile zevci Ahmed Çelebi b. Mahmud muvâcehesinde işbu mülk arsamdan terbî‘an on iki buçuk zirâ‘ şu mahal ile terbî‘an on iki zirâ‘ duvarımı gasb ve menzillerine zam ve ilhâk ettiklerinden gayrı menzillerinin işbu mu‘âyene olunan saçağı benim arsam üzerine tegallüben uzadıp ve suyunu bi-gayr-ı hakkın arsam üzerine icrâ eylediler deyü da‘vâya tasaddî eyledikde beynlerine muslihûn tavassut edip damlalık arsası yine sâhibe-i arzuhâl Râbia Hatun tasarrufunda olup lâkin mezbûr saçak hâli üzerine bâkī ve suyu mezbûr Râbia Hatun’un arsasına akıp ve iddi‘â eylediği on iki [109a] buçuk zirâ‘ arsa ve on iki zirâ‘ duvardan yirmi dört guruş üzerine sulh olup ve bedel-i sulhü merkūmân yedlerinden mezbûre Râbia Hatun ol meclisde tamamen ahz u kabz edip husûs-ı mezbûra müte‘allika da‘vâdan birbirlerinin zimmetlerini ibrâ eylediklerini mezkûr dâ‘îleri mahallinde tahrîr ba‘dehû ma‘an ba‘s olunan Çukadâr Hasan ve Muhzır Mustafa ile bu dâ‘îlerine inhâ eylediği huzûr-ı âlîlerine i‘lâm olundu. Fî 12 Rebî‘ülevvel sene [1]143.