Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 454 Hüküm no: 498 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İbrahim’in Yahûdi Nesim’in evinin altından geçen kârîz davsında haklı olduğu Ma‘rûz. Sâdır olan fermân-ı âlîlerine imtisâlen derûn-ı arzuhâlde mezkûr husûs için kıbel-i şer‘den irsâl olunan bâb nâibimiz umdetü’l-müderrisîni’l-kirâm Mustafa Efendi dâ‘îleri mahall-i nizâ‘ın üzerine varıp akd-i meclis-i şer‘ ettikde derûn-ı arzuhâlde mezkûrü’l-ism Balatlıoğlu demekle ma‘rûf Nesim nâm Yahûdi ile hasmı el-Hâc İbrahim terâfu‘larında mezbûr el-Hâc İbrahim mesfûr Yahûdi’nin işbu mülkü olan menzili mukābilinde vâki‘ arsası Ayasofya-i kebîr Vakfı’na mukāta‘a-i kadîme ile tasarrufunda ve ebniyesi yedimde mülküm olan ancak bir bâb Yahûdhânemin kârîzi çirkâbı kadîmden mesfûr Nesim Yahûdi’nin menzili tahtından cereyân edip deryâya dâhil olagelmişiken mesfûr Nesim Yahûdi zikrolunan kârîzin yolunu sed etmişdir deyü da‘vâ eyledikde mesfûr Nesim cevâbında kadîmden menzilim tahtından bârân vukū‘unda şiddet-i şitâda ancak seyl cereyân edip deryâya dâhil olagelip lâkin mezbûr el-Hâc İbrahim’in ve sâirlerinin kârîzi çirkâbı kat‘â menzilim tahtından cereyân edegelmemişdir deyü kâriz çirkâbı cereyân edegeldiğini bi’l-külliye inkâr etmekle mezbûr el-Hâc İbrahim ber-vech-i muharrer bârân vukū‘unda ve şiddet-i şitâda mesfûr Nesim’in menzil-i tahtından cereyân eden su yolu tahtından ancak bir bâb kendi mutasarrıf olduğu Yahûdhânenin kârîzi çirkâbı kadîmden cereyân edip deryâya dâhil olduğunu civârında vâki‘ Defterdâr iskelesi ve Ayvansaray ve Balat ahâlîlerinden müseccelü’l-esâmî on beş nefer Müslimîn şehâdetleriyle vech-i şer‘î üzere mesfûr Nesim muvâcehesinde isbât etmekle mezbûr dâ‘îleri mahallinde tahrîr ve mûcebince hüküm ve tenbîh eylediğini meclis-i şer‘de inhâ eylediği bi’l-iltimâs huzûr-ı âlîlerine i‘lâm olundu. Fermân hazret-i veliyyü’l-emrindir. Fî 10 şehri Rebî‘ülevvel sene [1]143. [Mühür] Bismillâhi’l-azîm İsmet