Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 464 Hüküm no: 521 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin malikane iltizamından dolayı Yedekçi Mehmed Ağa üzerine açtığı davanın hükümsüz olduğu Ma‘rûz. Arzuhâl eden Ali meclis-i şer‘de Yedekçi Mehmed Ağa tarafından sâbitü’l-vekâle vekîli olan es-Seyyid Mustafa mahzarında derûn-ı arzuhâlde mezkûr mâlikâne [bin] yüz otuz dört senesinde üç sene bir tahvîl ile benim der-uhde ve iltizâmımda iken müvekkil-i mezbûr Yedekçi Mehmed Ağa’nın âhar mâlikânesi voyvodası Cincioğlu ( ) nâm kimesne ber-vech-i muharrer uhdemde olan mâlikâne re‘âyâsından mâl-ı maktû‘larını bi-gayr-ı hakkın cem‘ ve tahsîl ve ahz u kabz etmeğin bundan akdem der-i devlet-medâra teşekkî eylediğimde mâl-ı maktû‘ re‘âyâdan tahsîl olunmak bâbında yedime emr-i âlî ihsân olunup lâkin bir vechile re‘âyâdan tahsîl mümkün olmamağın müvekkil-i mezbûr Yedekçi Mehmed Ağa’dan taleb ederim deyü tasaddî eylediği da‘vâsı şer‘an mesmû‘ olmayıp vekîl-i mezbûra şer‘an suâl tevcîh etmemeğin mezbûr Ali müvekkil-i mezbûr Yedekçi Mehmed Ağa’ya bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 16 Rebî‘ülâhir sene [1]143.