Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 465 Hüküm no: 522 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Beşe b. Ahmed’in kayınvâlidesi Marziye bt. Hasan’a inşa ettiği evin fiyatı konusunda yapılan keşif Kādı-yı sâbık Paşazâde Efendi gününde vâki‘ olan keşif i‘lâmıdır. Ma‘rûz. Sâdır olan fermân-ı âlîlerine imtisâlen savb-ı şer‘-i athardan irsâl olunan keşif nâibimiz Abdurrahman Efendi dâ‘îleri hâssa mi‘mârlarından Yusuf b. Mustafa ve Ahmed b. Mehmed nâm halîfeler ile İstanbul’da Fethiye Mahallesi’nde vâki‘ mahall-i nizâ‘a varıp ba‘de akd-i meclis sâhib-i arzuhâl Salih Beşe b. Ahmed meclis-i ma‘kūd-ı mezkûrda derûn-ı arzuhâlde mezkûre kayın anası Marziye bt. Hasan nâm hatun muvâcehesinde işbu akd-i meclis olunan menzilini binâ için bana seksen guruş verip ve dahi ziyâde ne giderse kadr-i ma‘rûf sarf ve menzilimi binâ eyle deyip ben dahi bi-şartü’r-rücû‘ emriyle işbu arsa-yı hâliyesi üzerine mu‘âyene olunan ebniyeyi ihdâs edip masrûfum iki yüz elli guruşa bâliğ oldu deyü medfû‘u olan seksen guruşdan izdiyâdını taleb eylediğimde masrûfumu istiksâr etmeğin masrûfum keşif ve tahmîn ve takvîm olunmak matlûbumdur dedikde gıbbe’t-tasdîk mi‘mârân-ı mezbûrân mezbûr Salih Beşe’nin ihdâs eylediği ebniyeye nazar ve bennâ zirâ‘ıyla mesâha ve takvîm ve tahmîn eylediklerinde esâmîsi cerîdede mahfûza olduğu vech üzere ferden ferdâ tahrîr ve yevm-i binâda olan kıymetleri muhitlerine vaz‘ ve cem‘an kıymetleri on beş bin yüz kırk sekiz akçeye bâliğa olup binâ-i mezkûr meblağ-ı mezbûr ile ancak olur deyü bi’l-ittifâk haber verdiklerini mezkûr dâ‘îleri mahallinde tahrîr ba‘dehû ma‘an ba‘s olunan Çukadâr Hasan ve Muhzır Mustafa ile bu dâ‘îlerine inhâ eylediği huzûr-ı âlîlerine i‘lâm olundu. Fî 11 Rebî‘ülevvel sene [1]143.