Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 466 Hüküm no: 523 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa Vakfı’na ait hamamı kiracısı Sâliha Hutun’a teslim için Balcıoğlu Mustafa’nın tenbih olunduğu Ma‘rûz. Sâhibe-i arzuhâl Sâliha Hatun derûn-ı arzuhâlde mezkûr Balcıoğlu Mustafa nâm kimesne mahzarında işbu Hüseyin nâm sagīrin babası müteveffâ Mustafa’dan müntakil bi’l-icâreteyn tasarrufunda olan Koca Mustafa Paşa Vakfı’ndan mahmiye-i İstanbul’da Eyyüb Ensârî kapısı dâhilinde vâki‘ vâkıfına intimâ ile tahdîd ve tavsîfden müstağnî çifte hamamın bundan akdem mezbûr Mustafa müsteciri iken hamam-ı mezbûrun kazganı tecdîde muhtâc oldukda sagīr-i mezbûrun mâlından bin beş yüz guruş sarf olunmak iktizâ etmeğin sâbıkā kassâm-ı askerî olan Nefeszâde es-Seyyid Mehmed Said Efendi huzûrunda ba‘de’l-murâfa‘a kazgan-ı mezbûru kendi mâlından teberru‘an tecdîd etmek üzere sene-i âtiyyesi mezbûra teklîf olundukda istîcârdan ibâ etmeğin kassâm-ı mûmâ-ileyh dahi mezbûrun müddet-i icâresi tamamında hama[m] mezkûru nef‘an li’l-vakf ve hayren li’l-yetîm kendi mâlımdan teberru‘an kazganını tecdîd etmeğe müte‘ahhide olduğum ecilden ecr-i misli ile bana îcâr olunmak üzere sagīr-i mezbûrun vasiyy-i muhtârı işbu Âişe Hatun’a tenbîh ve mûcebince yedine sened-i şer‘î vermekle vasiyye-i merkūme dahi müddet-i icâresi münkaziye oldukdan sonra bin yüz kırk iki senesi Zilhiccesi’nin yirmi beşinci gününedek beher senesi yetmiş bin akçe icâre ile üç seneye dek bi’l-vesâye bana îcâr ve teslîm ben dahi ba‘de’l-kabûl yedime mümzâ ve mahtûm temessük verdikden sonra işbu mezbûr Mustafa pişmân olup mütegallibeden vezîr kethüdâsı maktûl Mehmed Kethüdâ’ya istinâd ve mezbûrun tarafından vasiyy-i mezbûreye îcâr için cebr ü kerh ve yedimden bi-gayr-ı hakkın hamam-ı mezbûru gasben ahz u kabz etmişdir deyü mezbûrun yed-i mübtilesini hamam-ı mezkûrdan izâle ve kendiye teslîm olunmasını taleb ve da‘vâ ve takrîr-i meşrûhuna muvâfık mümzâ ve mahtûm îcâr temessükü ibrâz eyledikde gıbbe’s-suâl mezbûr Mustafa müdde‘iyye-i mezbûrenin hamam-ı mezkûru kendiden mukaddem ber-vech-i muharrer istîcâr eylediğini ikrâr u i‘tirâf etmeğin müddet-i icâre münkaziye olmadın kendinin istîcâr şer‘an sahîha olmamağla hamam-ı mezkûrdan kasr-ı yed ve ber-vech-i meşrûh müstecire-i sahîhası olan mersûme Sâliha’ya red ve teslîm iktizâ eylediği huzûr-ı âlîlerine i‘lâm olundu. Fî 17 Rebî‘ülâhir sene [1]143.